Tags-Khwab

aise kuchh ḳhvāb zamīnoñ ko jo shādāb kareñ
aise kuchh ḳhvāb jo shahroñ ko bhī shādāb kareñ

havā-e-hijr abhī tak hai mahv-e-ḳhvāb kahīñ
fasīl-e-jāñ pe charāġh-e-visāl jalte raheñ

thā qurb hī qurb hāsil ik din
ab ḳhvāb meñ us ke jāgtā huuñ

tā phir na intizār meñ niiñd aa.e umr bhar
aane kā ahd kar ga.e aa.e jo ḳhvāb meñ

umr huī ki dekh kar niiñd uchaT ga.ī thī haañ
aañkh ne phir kabhī raqam ḳhvāb nayā nahīñ kiyā

ab kis se kaheñ aur kaun sune jo haal tumhāre baad huā
is dil kī jhiil sī āñkhoñ meñ ik ḳhvāb bahut barbād huā

vo aise ḳhvāb the sote hue bhī
mirī fard-e-amal bhārī huī hai

ek mīThī sī kasak jaag uThī hai man meñ
yaad phir se mujhe ik ḳhvāb purānā aayā

na.ī jagah mujhe mānūs sī lagī to khulā
ye koī ḳhvāb meñ dekhā huā nazāra hai

ḳhaak par mere ḳhvāb bikhre the
aur maiñ reza reza chuntā thā

vaqt lafzoñ se banā.ī huī chādar jaisā
oḌh letā huuñ to sab ḳhvāb hunar lagtā hai

asar huā nahīñ us par abhī zamāne kā
ye ḳhvāb-zād hai kirdār kis fasāne kā

un āñkhoñ meñ mustaqbil ke ḳhvāb bhalā kyā utreñge
jin āñkhoñ ne dekh liyā hai vaqt se pahle niilā sach

sab ne ham ko ḳhush-hālī ke ḳhvāb dikhā kar chhoḌ diyā
galiyoñ galiyoñ ghuum rahā hai dhuul meñ lipTā nañgā sach

ḳhvāb kā chehra piilā paḌte dekhā hai
ik ta.abīr ko suulī chaḌhte dekhā hai

merā ye ḳhvāb ki tum mere qarīb aa.ī ho
apne saa.e se jhijaktī huī ghabrātī huī

ḳhvāb meñ mujh ko nazar aatī haiñ bhīgī sīpiyāñ
aañkh khulne par tirī āñkhoñ meñ paanī ho na ho

makān-e-ḳhvāb meñ jañgal kī baas rahne lagī
koī na aayā to zīnoñ pe ghaas rahne lagī

ḳhvāb palkoñ pe chale aate haiñ aañsū ban kar
is liye tujh ko lagātār nahīñ dekhtā maiñ

badal chukī hai har ik yaad apnī sūrat bhī
vo ahd-e-rafta kā har ḳhvāb har haqīqat bhī