Tags-Khwab

āñkhoñ meñ jo ek ḳhvāb sā hai
aalam kyā kyā dikhā rahā hai

koī bhī ḳhvāb ho āñkhoñ se bach kar rah nahīñ saktā
jazīre chhup bhī jaa.eñ to samundar dekh lete haiñ

bhar ke ā.ankhoñ meñ sulagte ḳhvāb us kī yaad ke
mujh ko sote meñ bhī 'haidar' jāgtā rakkhā gayā

ḳhvāb aur tamannā kā kyā hisāb rakhnā hai
ḳhvāhisheñ haiñ sadiyoñ kī umr to zarā sī hai

mirā shahr-e-ḳhvāb to reza reza bikhar chukā
kahīñ kho ga.ī mirī kahkashāñ maiñ udaas huuñ

tujhe ma.alūm kyā ai ḳhvāb-e-hastī dekhne vaale
vahī hastī hai hastī jo nisār-e-yār ho jaa.e

kyā ajab koī kiran ham-safar-e-ḳhvāb mile
tā-sahar le ke chaleñ niiñd ke maate ḳhud ko

tujhe bhulā.ūñ ki maiñ ḳhud ko bhuul jā.ūñ yahāñ
ḳhayāl-o-ḳhvāb kī duniyā satā rahī hai mujhe

pyaar kī na.ī dastak dil pe phir sunā.ī dī
chāñd sī koī sūrat ḳhvāb meñ dikhā.ī dī

dil bhī yahī hai vaqt bhī manzar bhī niiñd bhī
jaanā kahāñ hai ḳhvāb meñ jaanā kahāñ se hai

na dil meñ yaad na āñkhoñ meñ koī ḳhvāb-e-sahar
bikharte jism ke malbe meñ DhūñDhtā kyā hai

mire lab pe abhī vo savāl hai kyūñ? mire dil meñ abhī vo malāl hai kyūñ?
mire chāroñ-jānib jaal hai kyūñ? mire ḳhvāb kā ab anjām likho

ek ḳhvāb-o-ḳhayāl hai duniyā
e'tibār-e-nazar ko kyā kahiye

o mahv-e-ḳhvāb dīda-e-bīnā ke vāste
ḳhud jalve be-qarār haiñ tū jaag to sahī

ba-zāhir chashm-e-sāqī mahv-e-ḳhvāb-e-nāz hai lekin
javāb-e-nargis-e-bedār bhī ma.alūm hotī hai

manzil-e-ḳhvāb hai aur mahv-e-safar paanī hai
aañkh kyā kholīñ ki tā-hadd-e-nazar paanī hai

terā dayār raat mirī bāñsurī kī lai
is ḳhvāb-e-dil-nashīñ ko mirī kā.enāt kar

kabhī aisā ki ā.ankhoñ meñ nahīñ rakhte haiñ koī ḳhvāb
kabhī yuuñ hai ki ḳhvāboñ kī farāvānī bhī karte haiñ

kuchh na.e ḳhvāb na.ī ḳhvāhisheñ dāman meñ liye
har na.e saal kī tarġhīb na.ī lagtī hai

maiñ uḌtā rahtā huuñ niile samundaroñ meñ kahīñ
so titliyoñ ke liye ḳhvāb laatā rahtā huuñ