Tags-Khwab

mujh ko laa.ī hai ka.ī baar tire kūche tak
ḳhvāb-zāroñ se jo ik raah guzar jaatī hai

agar vo ḳhvāb hai jo aañkh meñ salāmat hai
to phir ye kyā hai jise dekhtā huuñ marte hue

baḌī aarzū thī ham ko na.e ḳhvāb dekhne kī
so ab apnī zindagī meñ na.e ḳhvāb bhar rahe haiñ

ḳhāk-dāñ ko hāsil-e-zauq-e-nazar samjhā thā maiñ
ḳhvāb ke aalam ko kitnā mo'atabar samjhā thā maiñ

huī thī ḳhvāb meñ ḳhushbū sī mahsūs
tum aa.e ḳhvāb kī ta.abīr dekhī

abhī shaam zarā sī mahkī hai par kyā kahiye kyā jaldī hai
abhī raat paḌāv bhī aage hai aur ḳhvāb bulāve aane lage

kho gayā hai jo us ko khone do
phir nayā ḳhvāb mujh ko bone do

ḳhvāhishoñ ḳhvāb dekhnā chhoḌo
niiñd aa.ī hai mujh ko sone do

namak ke sahrā meñ apnī palkoñ se
TukḌe TukḌe ye ḳhvāb chun luuñ

terā rūmān nayā ḳhvāb hai 'aḳhtar' ke liye
aa aur is ḳhvāb kī tābīr batā de aa kar

hamāre ḳhvāb-e-bahārāñ kī aabrū rakh le
kisī kalī kī tarah muskurā ke dekh hameñ

shelf pe ulTā kar ke rakh do aur bisrā do
gul-dānoñ meñ phuul sajāo ḳhvāb kā kyā hai

sher-goī hai vo shai jin kā sila dene ko
ḳhvāb-e-firdausī-e-ḳhush-fikr meñ rustam aayā

abhī tak niiñd ke panchhī jo palkoñ par nahīñ utre
mirī āñkhoñ meñ tere ḳhvāb kī ta.abīr ubhrī hai

andhe adam vajūd ke girdāb se nikal
ye zindagī bhī ḳhvāb hai tū ḳhvāb se nikal

na to yaad huuñ koī pur-kashish na hī ḳhvāb huuñ koī ḳhushnumā
dil-e-shād ko jo kare dukhī vo ḳhayāl huuñ maiñ dimāġh kā

mujh ko hasrat ki haqīqat meñ na dekhā us ko
us ko nārāzgī kyuuñ ḳhvāb meñ dekhā thā mujhe

aao ki koī ḳhvāb kareñ un ke havāle
dekhe hī nahīñ jin ne kabhī din meñ ujāle

hai mirī āñkhoñ meñ kaif-e-be-ḳhudī
ḳhvāb-e-doshīñ se abhī jaagā huuñ maiñ

duur tak koī nahīñ hai ham-ḳhayāl
aise ḳhvāb-ābād meñ tanhā huuñ maiñ