Tags-Khwab

ḳhvāb-e-baqā kī bas yahī ta.abīr hai ki 'lais'
duniyā meñ sirf ek fanā ko fanā nahīñ

dikhā.ī ḳhvāb meñ dī thī Tuk ik muñh kī jhalak ham kuuñ
nahīñ tāqat añkhiyoñ ke kholne kī ab talak ham kuuñ

huā hai charchā zamāne bhar meñ tumhārī be-nām chāhatoñ kā
to mujh se kyoñ tum chhupā rahe ho nigāhoñ meñ hai ye ḳhvāb kaisā

māhaul hī kuchh ho chaman-e-ḳhvāb kā aisā
bulbul mujhe samjhe to gul-e-tar mujhe dekhe

ai ḳhvāb-e-pazīrā.ī tū kyuuñ mirī āñkhoñ meñ
andesha-e-duniyā kī ta.abīr uThā laayā

naved-e-sub.h suntā hī nahīñ rañgīn ḳhvāb us kā
ghirā jaatā hai zulmat-rez kirnoñ meñ shabāb us kā

hindī meñ aur urdu meñ farq hai to itnā
vo ḳhvāb dekhte haiñ ham dekhte haiñ sapnā

vo vasīle se ḳhvāb meñ aa.ī
pahlī dekhī ga.ī thī us kī dost

ḳhvāb meñ bhī vahī añdherā hai
ḳhvāb meñ bhī nahīñ hai bijlī dost

ise bhī kuchh mirī himmat hī jāniye jo kabhī
ḳhayāl-o-ḳhvāb ke ambār se nikaltā huuñ

ḳhvāb āñkhoñ se chune niiñd ko vīrān kiyā
is tarah us ne mujhe be-sar-o-sāmān kiyā

ḳhvāb kā jashn manāne ke liye
log sunte haiñ ki ghar ghar jaage

un ko bedār na kahiye 'shā.er'
log jo ḳhvāb ke andar jaage

use dekhā thā ḳhat-e-ḳhvāb ke us paar kabhī
ye sitāra jo girā hai mire andar aa kar

jo mujhe aaj phir nazar aayā
ḳhvāb hai merī naujavānī kā

mere ḳhvāb zaḳhmī hue
to duniyā ke saare zābte jhūTe lage

hamāre dīda-e-hairat-zad meñ ḳhvāb kyā aa.e
ki terī aarzū baiThī hai is meñ pāsbāñ ho kar

shu.ūr-o-fikr pe ġhālib hai jism kā mausam
har ek ḳhvāb badan hai har ik ḳhayāl badan

kaash vo chashm-e-gurezāñ bhī kabhī jaan sake
ham ko kis ḳhvāb kī vahshat ne jagāyā huā hai

faqīh-e-shahr zindagī kī aañkh kā jo nuur thā
vo maiñ ne tere āstāñ pe ḳhvāb lā ke vaarā hai