Tags-Khwab

kahīñ to haiñ jo mire ḳhvāb dekhte haiñ 'zafar'
koī to haiñ jinheñ pyāre nahīñ samajhtā huuñ

gumāñ guzartā hai duniyā kī tez-gāmī se
ki log ḳhvāb bhī dekheñge dūr-bīnoñ se

haqīqateñ haiñ salāmat to ḳhvāb bahutere
malāl kyuuñ ho ki kuchh ḳhvāb rā.egāñ nikle

mirī āñkheñ salāmat haiñ to phir maiñ
parā.e ḳhvāb le kar kyā karūñgā

ḳhvāb ke rāste meñ
havā kā lagāyā huā

chamak uThte haiñ aañsū merī palkoñ ke kināroñ par
phir is ke ba.ad achānak ḳhvāb kā manzar badaltā hai

kuchh yuuñ TuuT ke girte haiñ āñkhoñ se ḳhvāb
shīsha bhī hairānī meñ aa jaatā hai

dam-e-ḳhvāb-e-rāhat bulāyā unhoñ ne to dard-e-nihāñ kī kahānī kahūñgā
mirā haal likhne ke qābil nahīñ hai agar mil ga.e to zabānī kahūñgā

maiñ chunarī DhūñDhtī rahī aur itnī der meñ
darvāze par khaḌā huā ik ḳhvāb mar gayā

chashm-e-dil khol is bhī aalam par
yaañ kī auqāt ḳhvāb kī sī hai

usī kī diid se mahrūm jis ko dekhnā chāhūñ
mirī āñkhoñ ko us ke ḳhvāb-gūñ paikar pe likh denā

maiñ apne vaqt meñ apnī ridā meñ rahtā huuñ
aur apne ḳhvāb kī āb-o-havā meñ rahtā huuñ

phir marhala-e-ḳhvāb-e-bahārāñ se guzar jā
mausam hai suhānā to garebāñ se guzar jā

kuchh ḳhvāb sajal muskānoñ ke
kuchh bol kabat dīvānoñ ke

ham ko haqīqatoñ ne kiyā hai ḳharāb-o-ḳhvār
ham ḳhvāb-e-ḳhvāb aur gumān-e-gumāñ ke the

ta.abīr us kī shāyad ek vāpsīñ nafas ho
jo ḳhvāb dekhte the ham saarī zindagī meñ

hai jahān-e-guzarāñ ḳhvāb kā bilkul naqsha
dīda-e-hazrat-e-insāñ ke liye dhokā sā

ik naqsh bigaḌne se ik had ke guzarne se
kyā kyā nahīñ mar jaatā ik ḳhvāb ke marne se

mire ḳhayāloñ meñ aaj bhī ḳhvāb ahd-e-rafta ke jāgte haiñ
tumhāre pahlū meñ kāhish-e-yād-e-pāstāñ thak ke so ga.ī hai