Tags-Khwab

usī se dhuup hai ambār-e-dhund hai rū-posh
giraft-e-ḳhvāb se barsar hai kārvāñ us kā

aisā lagtā hai ḳhvāb kī ta.abīr
dekhtā hai ḳhudā makānoñ meñ

yahī nahīñ ki faqat rizq-e-ḳhvāb band huā
gadā-e-kū-e-hunar bhī sagāñ kī zad meñ hai

sulāyā kis ne gale lagā kar ki suur bhī thak gayā jagā kar
bapā hai aalam meñ shor-e-mahshar mujhe jo dekho to ḳhvāb meñ huuñ

maiñ dukh apne ḳhvāb kā
tum ne jis kī mazdūrī nahīñ dī

guloñ ke chehre khile hue haiñ havā meñ ḳhush-bū mahak rahī hai
ye merī āñkhoñ ne ḳhvāb dekhā ki sail-e-husn-o-jamāl aayā

ḳhvāb muTThī meñ liye phirte haiñ sahrā sahrā
ham vahī log haiñ jo dhuup ke par kāTte haiñ

haqīqat ḳhvāb meñ Dhalne ko thī maujūdgāñ meñ
samay kī aañkh ke ā.indagāñ meñ din nahīñ thā

kisī ne ḳhvāb meñ aakar mujhe ye hukm diyā
tum apne ashk bhī bhejā karo duāoñ ke saath

ek hī ḳhvāb ne saarī raat jagāyā hai
maiñ ne har karvaT sone kī koshish kī

'rūhī' maiñ ḳhvāb-e-ishq se jaagī to us ke baad
kitne hī māh-o-sāl ne sone nahīñ diyā

tū imārat ke mahal kā ḳhvāb chhoḌ
ḳhvāb meñ bas jhoñpaḌī kā baas rakh

saarī duniyā kā safar ḳhvāb meñ kar Daalā hai
koī manzar ho mirā dekhā huā hotā hai

ḳhvāb meñ toḌtā rahtā huuñ anā kī zanjīr
aañkh khultī hai to dīvār nikal aatī hai

ḳhvāb ho jā.eñge haqīqat bhī
shiddat-e-ishq meñ shabāb to de

ḳhvāb ko har ḳhvāb kī ta.abīr miltī hai kahāñ
kuchh ḳhayāl aise bhī haiñ jo rā.egāñ rah jā.eñge

sahar anjān sī maġhmūm sā ḳhvāb-e-vafā kyuuñ hai
na jaane qurbatoñ ke naam se ye fāsla kyuuñ hai

rañgīn ḳhvāb aas ke naqshe jalā bhī de
jaañ pe banī hai raushnī is ko bujhā bhī de

ab kisī ḳhvāb kī zanjīr nahīñ paañv meñ
taaq par vasl kī ummīd bhī āḳhir rakkhī

so ab ta.abīr kī dhun hai ki dekhe jā chuke haiñ
vagarna ḳhvāb-e-nā-mumkin se aage jā chuke haiñ