Tags-Khwab

maiñ so rahā huuñ tire ḳhvāb dekhne ke liye
ye aarzū hai ki āñkhoñ meñ raat rah jaa.e

bas gayā thā ḳhayāl-o-ḳhvāb meñ vo
vo ḳhumārī bhī kyā ḳhumārī thī

sochā hai tumhārī āñkhoñ se ab maiñ un ko milvā hī duuñ
kuchh ḳhvāb jo DhūñDte phirte haiñ jiine kā sahārā āñkhoñ meñ

ham-nafas ḳhvāb-e-junūñ kī koī ta.abīr na dekh
raqs karnā hai to phir paañv kī zanjīr na dekh

tū parastār-e-amal hai to amal kī ḳhātir
ḳhvāb-e-rañgīñ kī qasam ḳhvāb kī ta.abīr na dekh

bhūke kī tum bhuuk miTāo to phir koī baat bane
shīsh-mahal ke ḳhvāb sunahre dikhlāne se kyā hogā

isī tarah se rakho band merī āñkheñ ab
ki niiñd ḳhvāb badalne ke baad aa.ī hai

koī jhankār rag-e-gul meñ na thī
ḳhvāb koī kisī patthar meñ na thā

yuuñ hī to chup nahīñ huuñ maiñ koī to baat hai zarūr
ye jo qazā huā hai ḳhvāb sajda thā jo qazā huā

fikr-e-ta.abīr meñ niiñd uḌ ga.ī dīvānoñ kī
ḳhvāb apne hī un āñkhoñ meñ jo bedār mile

jilau meñ ḳhvāb-numā rat-jage sajā.e hue
kahāñ kahāñ liye phirtī haiñ vahshateñ dil kī

koh sañgīn haqā.eq thā jahāñ
husn kā ḳhvāb tarāshā ham ne

kaun thā bālīñ pe mast-e-ḳhvāb-e-nāz
sham.a kā ruḳhsat vo honā yaad hai

āñkhoñ ko ḳhvāb-nāk banānā paḌā mujhe
sau ratjagoñ se rabt baḌhānā paḌā mujhe

har ek raah meñ miTe mai-e-nuqūsh-e-ārzū
har ik taraf thakī thakī sī rahguzār ḳhvāb hai

ye mere sāthī haiñ pyāre sāthī magar inheñ bhī nahīñ gavārā
maiñ apnī vahshat ke maqbare se na.ī tamannā ke ḳhvāb dekhūñ

duhā.ī de ke vo jamhūriyat kī
nizām-e-ḳhvāb rusvā kar rahā hai

husn ke manzar-e-saffāk nazar aate saaf
parda-e-ḳhvāb ko āñkhoñ se haTā denā thā

paañv meñ vo nasha talab kā nahīñ
ab to sarmast-e-ḳhvāb haiñ donoñ

tannūr-e-yaḳh meñ ThiThurte haiñ ḳhvāb o ḳhuuñ us ke
likhā hai naam sar-e-lauh-e-raftagāñ us kā