Tags-Khwab

anjāne ḳhvāb kī ḳhātir kyuuñ chain gañvāyā
kab vaqt kā panchhī Therā kab saaya haath meñ aayā

jo reg-e-dil pe likhā hai us ko dukhoñ kā paanī miTā na Daale
maiñ ḳhvāb dekhe hī jā rahā huuñ ye aañkh barse hī jā rahī hai

tujh se mil jaane ke imkāñ hue kaise kaise
ḳhvāb hī meñ sahī sāmāñ hue kaise kaise

vo shakl ek ḳhvāb thī aur ḳhvāb ḳhvāb hai
kab tak ye ḳhvāb dīda-e-bedār dekhnā

jhuuT hī hotā magar ḳhvāb to hotā koī
vo hamārā hai sar-e-rāh dikhāvā karte

merī in āñkhoñ meñ jugnū se chamakte haiñ ka.ī
ḳhvāb aate haiñ mirā niiñd meñ pīchhā karte

chashm hai mahrūm-e-sūrat gosh māyūs-e-sadā
ḳhvāb thā jo kuchh ki dekhā jo sunā afsāna thā

har ek shaḳhs yahāñ mahv-e-ḳhvāb lagtā hai
kisī ne ham ko jagāyā nahīñ bahut din se

udaas āñkhoñ meñ kitne ḳhushī ke ḳhvāb haiñ aaj
tirī zamīn ke qarz ham pe be-hisāb haiñ aaj

anā kī sar-kashī ummīd-e-armāñ ḳhvāb kī duniyā
dhaḌakte dil fusūn-e-zindagī meñ aks kis kā hai

ye 'sayyad' ḳhvāb se tarshe hue nāzuk hasīñ paikar
nuqūsh-e-rashk-e-sehr-e-sāmrī meñ aks kis kā hai

jis ko majbūr huā hai to khurachne pe 'zafar'
terī āñkhoñ kā hasīñ ḳhvāb bhī ho saktā hai

shikam-serī se pahle lamha-bhar ko soch lenā
hamāre ḳhvāb dastar-ḳhvān par rakkhe hue haiñ

ho ga.iiñ palkoñ se hī ruḳhsat vo maujeñ ḳhvāb kī
Derā Daale hai yahāñ āñkhoñ ke andar tishnagī

maiñ likh rahā thā tirī ḳhvāb-gāh kī yādeñ
ki so gayā thā vahīñ rakh ke haath kāġhaz par

hamesha haath rahā hai 'jamāl' āñkhoñ par
kabhī ḳhayāl kabhī ḳhvāb par guzāra kiyā

ḳhushī na mil sakī āñkheñ mirī pur-āb rahīñ
ḳhayāl-o-ḳhvāb kī bāteñ ḳhayāl-o-ḳhvāb rahīñ

base hue haiñ mire ḳhvāb jin meñ ai 'ābid'
vo bastiyāñ to hamesha hī zer-e-āb rahīñ

shab-e-siyāh se niklegā māhtāb koī
ufuq meñ dekhte rahiyegā roz ḳhvāb koī

ḳhvāb manzil ke sajā.e the merī āñkhoñ ne
aur 'hinā' gard-e-safar phail ga.ī chehre par