Tags-Khwab

mar gayā zulf kī maiñ pech uThā kar ai 'barq'
kyuuñ na afsāna mirā ḳhvāb-e-pareshāñ hotā

āñkheñ black-and-white haiñ to phir in meñ kyuuñ
rañg-birañge ḳhvāb kahāñ se aate haiñ

pichhlī kitnī rātoñ se maiñ ḳhvāb yahī ek dekh rahā huuñ
haath ye mere haath nahīñ haiñ paañv ye mere paañv nahīñ haiñ

maiñ zād-e-rah ke taur pe bas ḳhvāb laa.ī huuñ
ai ham-safar tujhe ye gavārā to hogā nā

ek ik ḳhvāb yahīñ dafn huā hai 'sāqib'
dekhnā sog meñ hai arz-e-dakan āḳhir-e-shab

ye ḳhvāb hai yā tilism koī ki ḳhushk patte
khiñche chale jā rahe haiñ āb-e-ravāñ kī jānib

ho fursat-e-ḳhvāb jo mayassar
ik aur hī bahr o bar banā.ūñ

kahāñ ke aish-o-ġham kaisī murādeñ kaise andeshe
ki saarī zindagī ḳhvāb-e-pareshāñ hai jahāñ maiñ huuñ

bahr-e-pursish hī sahī aaj tirā aa jaanā
ek hī vaqt meñ ta.abīr bhī hai ḳhvāb bhī hai

tum se pahle bhī ḳhvāboñ kī gardan uḌāne baḌe aa.e the
sar kaTe ḳhvāb chillā uThe dosto aas martī nahīñ

muusā ne ek ḳhvāb-e-haqīqat banā diyā
vaise to gahre paanī meñ rasta sarāb hai

mujhe vo ḳhvāb phir se dekhnā thā
maiñ ḳhud pe niiñd taarī kar rahā thā

bhūlā-bisrā ḳhvāb hue ham
kuchh aise nāyāb hue ham

ḳhvāboñ kī ta.abīr bhī dekheñ
itne kab ḳhush-ḳhvāb hue ham

darūn-e-halqa-e-zanjīr huuñ maiñ
shikasta ḳhvāb kī ta.abīr huuñ maiñ

ḳhvāb Takrāo haqīqat se ki sho.ale nikleñ
is añdhere meñ diyā ek hī kaafī to nahīñ

aa kar phirā na naam ko āñkhoñ meñ ḳhvāb-e-shab
kyā kyā rahā hai dil ko mire iztirāb-e-shab

maiñ faqat ek ḳhvāb thā terā
ḳhvāb ko kaun yaad rakhtā hai

ḳhvāb āñkhoñ meñ ab na.e hoñge
zindagī bhī sañvar ga.ī hogī

kyā ḳhabar thī ki taras jā.egā ta.abīroñ ko
apnī āñkhoñ meñ tire ḳhvāb sajāne vaalā