Tags-Khwab

ḳhvāb kyā hai ki TūTtā hī nahīñ
ik nasha hai ki TūTtā hī nahīñ

TūTtā jā rahā hai ik ik ḳhvāb
silsila hai ki TūTtā hī nahīñ

uThāyā dosh-e-mizhgāñ par jo bār-e-ḳhvāb to jaanā
girānī kyā balā hai nā-tavānī kis ko kahte haiñ

ab vahāñ dāman-kashī kī fikr dāman-gīr hai
ye mire ḳhvāb-e-mohabbat kī na.ī ta.abīr hai

ham aise so.e bhī kab the hameñ jagā laate
kuchh ek ḳhvāb to shab-ḳhūn se bachā laate

ik zehn-e-pareshāñ meñ ḳhvāb-e-ġhazalistāñ hai
patthar kī hifāzat meñ shīshe kī javānī hai

mirā afsāna o afsūñ tire kan sabz kyūñke ho
siyah mizhgāñ tumhārī dekh ke sabze kuuñ ḳhvāb aave

ġhazal ke shānoñ pe ḳhvāb-e-hastī ba-chashm-e-pur-nam Thahar ga.e haiñ
ye kis ne chheḌī hai tān-e-māzī rabāb-o-sargam Thahar ga.e haiñ

TuuTā mirā har ḳhvāb huā jab se judā vo
itnā to kabhī dil mirā be-ās nahīñ thā

bhalā maiñ kyoñ tumhāre ḳhvāb dekhūñ
tumhāre saath jab rahnā nahīñ hai

Duub jaatā hai har ik manzar-e-ḳhvāb
terī āñkhoñ meñ bhañvar ho jaise

mujh ko paḌhnā thā ki puure ḳhvāb apne kar sakūñ
beach aayā muflisī kā vāqi.a rote hue

'mīr' hoñ yā 'zahīr' hoñ ki 'kabīr'
sab kī qismat meñ ek ḳhvāb aayā

ḳhvāb jaisī hī koī apnī kahānī hotī
yuuñ to barbād na ye apnī javānī hotī

ham to mil kar na mil sake tum ko
tum ko dekhā ki ḳhvāb dekhā hai

ab ba.ad-e-fanā kis ko batā.ūñ ki maiñ kyā thā
ik ḳhvāb thā aur ḳhvāb bhī ta.abīr-numā thā

mire ḳhudāyā maiñ zindagī ke azaab likkhūñ ki ḳhvāb likkhūñ
ye merā chehra ye merī āñkheñ

dil kabhī ḳhvāb ke pīchhe kabhī duniyā kī taraf
ek ne ajr diyā ek ne ujrat nahīñ dī

shab palañg par hāñpte saa.e rahe
ḳhvāb darvāze khaḌā taktā rahā

vo ḳhvāb se ye kahtā thā
ki tujh ko sach karūñgā maiñ