Tags-Khwab

panāh DhūñDte guzrī hai zindagī 'kaifī'
jhulastī dhuup meñ saa.e ke ḳhvāb dekhe haiñ

kaisā bādal hai lipaT jaatā hai mujh se ḳhvāb meñ
kaisī bārish hai ki shab bhar bhīgtī rahtī huuñ maiñ

mirī har raat nīñdoñ se ḳhafā hai
mirā har ḳhvāb katba ban rahā hai

ba-tarz-e-ḳhvā sajānī paḌī hai āḳhir-kār
na.ī zamīn banānī paḌī hai āḳhir-kār

duniyā hai ḳhvāb hāsil-e-duniyā ḳhayāl hai
insān ḳhvāb dekh rahā hai ḳhayāl meñ

hashr-sāmāñ huiiñ vīrāñ āñkheñ
phir kasī ḳhvāb meñ khoyā koī

yaad haiñ ab bhī apne ḳhvāb tumheñ
mujh se mil kar udaas bhī ho kyā

sone kī jagah roz badaltā huuñ maiñ lekin
vo ḳhvāb kisī tarah badaltā hī nahīñ hai

jahāñ ram-dīda ġhazālān-e-taḳhayyul ne use dekhā ho
ye koī ḳhvāb-e-dil-āvez na thā

palak jhapakne meñ kuchh ḳhvāb TuuT jaate haiñ
jo but-shikan hai vahī lamha but-tarāsh bhī thā

phir na.e ḳhvāb buneñ phir na.ī rañgat chāheñ
zinda rahne ke liye phir koī sūrat chāheñ

vo jin ke dam se zamāne ke ḳhvāb rañgīñ haiñ
hamārī niiñd bhī aa kar kabhī harām kareñ

ye merī aañkh hai yaañ ḳhvāb kaise Thahreñge
ki sīm-ḳhurda zamīñ hai jo nam ziyāda hai

jise dekhā na maiñ ne ḳhvāb meñ bhī
ta.āqub meñ vo ghar tak aa gayā hai

ḳhayāl-o-ḳhvāb kī galiyoñ meñ bhī hai vīrānī
mirī udaas nazar ko talāsh kis kī hai

sab ba-āsānī mire ḳhvāb ko paḌh lete the
phir to maiñ anjuman-e-dil-zadagāñ se niklā

kahīñ ye ḳhvāb mirā zindagī na ban jaa.e
charāġh bujhtā huā raushnī na ban jaa.e

ḳham-e-jāda se maiñ piyāda-pā kabhī dekh letā huuñ ḳhvāb-sā
kahīñ duur jaise dhuāñ uThā kisī bhūlī-bisrī sarā.e se

shikast-e-ḳhvāb kā hameñ malāl kyuuñ nahīñ rahā
bichhaḌ ga.e to phir tirā ḳhayāl kyuuñ nahīñ rahā

vo zulf zulf raat kyuuñ bikhar bikhar ke rah ga.ī
vo ḳhvāb ḳhvāb silsila bahāl kyuuñ nahīñ rahā