Tags-Khwab

husn kī vo sūrateñ ḳhvāb-e-pareshāñ ho ga.iiñ
parda-e-dil meñ lagā kar aag pinhāñ ho ga.iiñ

majma-e-ahbāb kī rūdād 'sāqib' kyā kahūñ
ab vo aglī sohbateñ ḳhvāb-e-pareshāñ ho ga.iiñ

bistar-e-nik.hat pe ye putlī jo mahv-e-ḳhvāb thī
mast añgḌā.ī ke hāthoñ jaag uThī sharmā ga.ī

ek nannhī sī aarzū ke liye
ḳhvāb meñ ghar banā ke dekho to

kabhī maiñ zindagī kī nāz-bardārī na kar paayā
hamesha biich meñ haa.il rahā ik ḳhvāb

baġhal meñ ġhair kī aaj aap sote haiñ kahīñ varna
sabab kyā ḳhvāb meñ aa kar tabassum-hā-e-pinhāñ kā

rakh kar ridā-e-ishq meñ kuchh phuul aur ḳhvāb
'shāhīn' aaj merī tarah mar rahī hai raat

vahīñ chauñk uThtā maiñ ḳhvāb-e-lahad se
mirā shāna tū ne hilāyā to hotā

jab buzurgoñ kī duā.eñ ho ga.iiñ be-kār sab
qarz-e-ḳhvāb-āvar se dil ko shaad kar lete haiñ ham

nam hai mere sher se us chashm-e-sañg-ālūd meñ
ḳhvāb huuñ us chashm-e-tar meñ phailtā jaatā huuñ maiñ

jo ḳhvāb ban nahīñ paayā thā merī āñkhoñ kā
Thahar gayā hai mire aa.ine pe zañg vahī

ḳhvāb āñkhoñ meñ chubh rahe the 'nabīl'
so ye āñkheñ badal rahā huuñ maiñ

paanī kī lahroñ par bahtī āñkhoñ meñ
kitne bhūle ḳhvāb jagā kar tanhā huuñ

jab hijr ke shahr meñ dhuup utrī maiñ jaag paḌā to ḳhvāb huā
mirī soch ḳhizāñ kī shāḳh banī tirā chehra aur gulāb huā

maiñ ik ḳhayāl sar-e-rahguzār-e-shab thā 'sa.īd'
kisī ke ḳhvāb ne ta.abīr kar liyā hai mujhe

huā kartī hai dil se guftugū be-ḳhvāb rātoñ meñ
magar khultā nahīñ mujh par ki 'aḳhtar' guftugū kyā hai

ḳhvāb the ik din auj-e-zamīñ se kāhkashāñ ko chhū leñge
kheleñge gul-rañg shafaq se qaus-e-quzah meñ jhūleñge

niiñd se ab bhī duur haiñ āñkheñ go ki rahīñ shab-bhar be-ḳhvāb
yādoñ ke be-ma.anī daftar ḳhvāboñ ke afsurda shahāb

zindagī ik ḳhvāb hai ye ḳhvāb kī tābīr hai
halqa-e-gesu-e-duniyā paañv kī zanjīr hai

tumhāre ḳhvāb kī ta.abīr ho jā.ūñ ijāzat hai
mohabbat kī maiñ ik tasvīr ho jā.ūñ ijāzat hai