Tags-Khwab

'maz.har' us kī niiñd uḌā dī
ham ne jis ko ḳhvāb dikhāyā

tujhī ko nafrat rahī hai jin se vo jin kī ta.abīr sirf tū hai
vo āḳhir-e-shab ke ḳhvāb karne paḌeñge āḳhir qubūl tujh ko

mujhe niiñd se koī ranjish nahīñ hai
agar ḳhvāb kuchh āsmānī milā do

jiinā mushkil to bahut hai tirī is duniyā meñ
lekin is ḳhvāb ko marnā bhī nahīñ chāhiye hai

barsāt kā ik ḳhvāb hai mustaqbil-e-tārīk
bikhrī huī sī zulf-e-girah-gīr kisī kī

kyuuñ pareshān rahtā hai 'ġhavvās'
terī taqdīr mahv-e-ḳhvāb na ho

jaise dukh bhare din aate haiñ hāthoñ meñ
aise be-bas aañsū aate haiñ āñkhoñ meñ ḳhvāb nahīñ aate

jo mumkin ho tum apne haath kī rekhā khurach Daalo
ki ham haiñ to sahī ḳhvāb-e-pareshāñ dekhne vaale

ġhamoñ ke añdheroñ meñ ġharqāb huuñ maiñ
amāvas kā bikhrā huā ḳhvāb huuñ maiñ

resmāñ bāñdh kar ḳhvāb hañste rahe
habs kī taal par saañs chalte rahe

ḳhvāb kuchh kar guzarne kā terā
gahrī nīñdoñ se bhī jagā degā

kabhī sukūñ to kabhī iztirāb bhī jhelā
khulī jo aañkh to anjām-e-ḳhvāb bhī jhelā

hai ye nigār-ḳhāna jo ḳhvāb-o-ḳhayāl sā
is ā.īne meñ merī ye sūrat bhī hai fareb

so rahā huuñ maiñ ki ye jaagā huā sā ḳhvāb hai
lā-shu.ūrī vus.atoñ meñ ūñghtā sā ḳhvāb hai

muḳhtasar haiñ zindagī ke din magar rāteñ tavīl
bevafā āñkhoñ ko hāsil bā-vafā sā ḳhvāb hai

ek manzar ko mukammal dekhtā hai kaun ab
koī suntā hai kahāñ kyā gūñjtā sā ḳhvāb hai

naag hai sāya-fagan sar par huuñ maiñ mahv-e-ḳhirām
mujh apāhij ko mayassar shañkar-āsā ḳhvāb hai

shā.irī meñ anfus o āfāq mub.ham haiñ abhī
isti.āra hī haqīqat meñ ḳhudā sā ḳhvāb hai

ḳhaam hai 'kāvish' hamārā ḳhvāb din meñ dekhnā
shaiḳh-chillī aur sab kā be-tukā sā ḳhvāb hai

ye niiñd kā jhoñkā to nahīñ be-ḳhudī-e-ishq
hushyār ki vo ḳhvāb-e-girāñ aur hī kuchh hai