Tags-Khwab

raat ik ḳhvāb ne āñkheñ mire andar kholīñ
aur bistar kī shikan khīñch ke sīdhī kar dī

sabr kī chādar ko oḌhe ḳhvāb-gāhoñ meñ raho
sach kī duniyā chhoḌ kar va.adoñ kī bastī meñ chalo

kisī se ḳhvāb meñ milnā hai shāyad
ki vo gesū sañvāre so chuke haiñ

duniyā hai ḳhvāb hāsil-e-duniyā ḳhayāl hai
insān ḳhvāb dekh rahā hai ḳhayāl meñ

ḳhvāb ta.abīroñ ke ma.anī pūchhte haiñ
niiñd be-anjām ho kar rah ga.ī hai

tum ho ki mire lab pe duā rahtī hai koī
ā.ankhoñ ne koī ḳhvāb sā dekhā hai ki tum ho

jab bhī koī detā hai dar-e-ḳhvāb pe dastak
maiñ sochne lagtā huuñ ki duniyā hai ki tum ho

churā ke le ga.ī jaane havā-e-shab kyā kyā
uThe to ḳhvāb-darīchā khulā huā niklā

ik umr ḳhvāb meñ guzrī thī rañg bharte hue
khulī jab aañkh to manzar dhulā huā niklā

sub.h tak sahmī rahīñ āñkheñ mirī
ḳhvāb kaisī raah se guzrā hai tū

tire ḳhayāl ko zanjīr kartā rahtā huuñ
maiñ apne ḳhvāb kī tābīr kartā rahtā huuñ

nahīñ aatā vo jo idhar zarā hamīñ intizār meñ us ke yaañ
kabhī jhāñknā kabhī tāknā kabhī be-kalī pai.e-ḳhvāb hai

chamakte ḳhvāb milte haiñ mahakte pyaar milte haiñ
tumhāre shahr meñ kitne hasīñ āzār milte haiñ

ḳhvāb to ḳhvāb rahe niiñd bhī aane se rahī
gard-e-bedārī-e-shab muñh pe malī kyā na huā

ab apne apne ḳhuuñ kī amānat hai aur ham
aur in amānatoñ kī hifāzat ke ḳhvāb haiñ

hamāre shahr ke manzar na dekh pā.eñge
yahāñ ke log to āñkhoñ meñ ḳhvāb rakhte haiñ

bhulā de arsh kī jannat kā ḳhvāb āñkhoñ ko
bahār-e-husn se yuuñ mālā-māl thā koī

maiñ ne akasr ḳhvāb meñ dekhā
ḳhauf tarāshe kohsāroñ kī god meñ jaise

sho.ala sho.ala hai har ik shāḳh mirī palkoñ kī
phir bhī āñkhoñ meñ hasīñ ḳhvāb kā paikar kyuuñ hai

tirī shoḳh āñkhoñ meñ bārhā ka.ī ḳhvāb dekhe haiñ pyaar ke
tirā pyaar merā nasīb hai kisī aur ko ye vafā na de