Tags-Khwab

jab se dekhā hai ḳhvāb meñ us ko
dil musalsal kisī safar meñ hai

phir titliyāñ sī uḌne lagīñ dasht-e-ḳhvāb meñ
phir ḳhvāhish-e-visāl hai aur chāñd-rāt hai

ā.ina-āsā ye ḳhvāb-e-nīlamīñ rakkhūñgā maiñ
aur us ujle sitāre par yaqīñ rakkhūñgā maiñ

is ḳhvāb meñ un ko nahīñ ḳhud apnī ḳhabar tak
ik nuur uḌā jaatā hai parvāz-e-nazar tak

nazroñ meñ abhī tak vahī dilchasp samāñ hai
āñkhoñ meñ mirī ḳhvāb-gah-e-shāhjāñ hai

kabhī jo dhuup to paikar pighal ga.e saare
koī bhī naqsh mujhe mere ḳhvāb sā na milā

pahle to neze ḳhvāb meñ boyā kareñge raat din
āñkhoñ se apnī ḳhuun phir dhoyā kareñge raat din

ham titliyoñ ke pañkh pe dhāreñ lagā ke niiñd kī
ik shahr-e-nau ke ḳhvāb meñ chhoḌā kareñge raat din

kalī ko dekh ke sarshār ḳhvāb kyā guzrī
nasīm-e-sub.h jagāne jo aa.ī raat ke baad

apnī āñkhoñ meñ ab khaTakte haiñ
chashm-e-yārāñ kā ḳhvāb the jab the

ye jo āñkheñ bujhī bujhī haiñ naañ
in meñ bhī chand ḳhvāb the jab the

ḳhvāb ke saath kahīñ kho na ga.ī ho āñkheñ
jab uThūñ so ke to chehre ko TaTolūñ pahle

hai ye ummīd mire ḳhvāb meñ aap ā.eñge
ek dar aañkh kā rakhtā huuñ khulā raat ke vaqt

is ḳhvāb meñ kyā nahīñ dar-asl
bas kah to diyā nā ḳhvāb jo thā

tum kāġhzī kashtī meñ dariyā ko paar karo tab samjhoge
ashkoñ se labālab āñkhoñ meñ kyuuñ ḳhvāb sajānā mushkil hai

zamīr-e-ḳhāk meñ ḳhufta hai merā dil 'amjad'
ki niiñd mujh ko milī ḳhvāb-e-raftagāñ ke liye

nahīñ hai ḳhvāb ye sach hai na e'tibār aayā
ye kyā huā ki unheñ aur mujh pe pyaar aayā

maiñ apnī āñkheñ bhī rakh aa.uuñ us kī chaukhaT par
ye saare ḳhvāb mire aur rat-jagā le chal

kabhī vo jism huā aur kabhī vo ruuh tamām
usī ke ḳhvāb the āñkhoñ meñ ham jidhar se ga.e

mirā hī rañg the to kyuuñ na bas rahe mujh meñ
mirā hī ḳhvāb the to kyuuñ mirī nazar se ga.e