Tags-Khwab

ye jo rātoñ ko mujhe ḳhvāb nahīñ aate 'atā'
is kā matlab hai mirā yaar ḳhafā hai mujh se

bahtī huī āñkhoñ kī ravānī meñ mare haiñ
kuchh ḳhvāb mire ain-javānī meñ mare haiñ

jahāñ bhī chāhūñ maiñ manzar uThā ke le jā.ūñ
ki ḳhvāb dīda-e-amvāl meñ paḌe hue haiñ

to shāh-zādī ko laa.eñ vo mahv-e-ḳhvāb hai kyā
hameñ yaqīñ nahīñ pariyāñ bhī jhuuT boltī haiñ

ḳhvāb aur ḳhvāb kā fusūñ nahīñ kuchh
aañkh khul jaa.e to junūñ nahīñ kuchh

tū ek naam hai magar sadā-e-ḳhvāb kī tarah
maiñ ek harf huuñ magar nishān-e-āb kī tarah

maiñ 'asġhar'-e-hazīñ kabhī kisī ke dostoñ meñ thā
vo din bhī mujh ko yaad haiñ ḳhayāl-e-ḳhvāb kī tarah

vo ḳhvāb kyā thā ki jis kī hayāt hai ta.abīr
vo jurm kyā thā ki jis kī sazā hai tanhā.ī

dildār bhī mile hameñ par is ko kyā kareñ
koī ḳhayāl sā to koī ḳhvāb sā milā

ḳhayāl-o-ḳhvāb huī haiñ mohabbateñ kaisī
lahū meñ naach rahī haiñ ye vahshateñ kaisī

duniyā ḳhayāl-o-ḳhvāb hai merī nigāh meñ
ābād sab ḳharāb hai merī nigāh meñ

kuchh rat-jage the jin kī zarūrat nahīñ rahī
kuchh ḳhvāb the jo mere ḳhayāloñ meñ aa ga.e

kabhī vo din the ki niiñd āñkhoñ kī sarhadoñ se pare pare thī
magar maiñ ab jab bhī sonā chāhūñ tumhārī yādoñ ke ḳhvāb likkhūñ

manzar bhaTak rahe the dar-o-bām ke qarīb
maiñ so rahā thā ḳhvāb ke pichhle makān meñ

mahv-e-liqā jo haiñ malakūtī-ḳhisāl haiñ
bedār ho ke bhī nazar aate haiñ ḳhvāb meñ

sab mumkin thā pyaar mohabbat hañste chehre ḳhvāb-nagar
lekin ek anā ne kitne bhole din barbād kiye

chunriyoñ meñ ḳhvāb le kar chal paḌī haiñ beTiyāñ
in parā.e des jaatī Doliyoñ kī ḳhair ho

sāl-hā-sāl se maiñ to safar-e-ḳhvāb meñ huuñ
vahī nādāñ hai ki ta.abīr-e-vafā chāhtā hai

tab talak kūza-garo ḳhvāb hai ta.abīr mirī
jab talak puurī tarah toḌ na Daalo mujh ko

āñkheñ neze pe Tike dekh ke apnī 'nāyāb'
bol uThe ḳhvāb bhī ab to ki na paalo mujh ko