Tags-Kitab

kitāb-e-dil ke varaq jo ulaT ke dekhtā hai
vo kā.enāt ko auroñ ko haT ke dekhtā hai

koī chehra ho ġhaur se paḌhiye
is se jāme.a koī kitāb kahāñ

fasīl-e-fikr se girtā huā misra.a uThānā hai
sirhāne ab mujhe har dam kitāb-e-'mīr' rakhnī hai

abhī thā salā-e-zan-e-sabaq abhī thī kitāb-e-varaq-varaq
kabhī madrase meñ rahā 'qalaq' kabhī mai-kade meñ rahā 'qalaq'

ham na.ī fikr ke payambar haiñ
ham pe bhī ik na.ī kitāb utre

aziyyateñ hī na apnī kitāb meñ likhiye
sukūñ kā pal bhī to sāñsoñ ke baab meñ likhiye

tū mujh ko bhūlnā chāhe to bhuul saktā hai
maiñ ek harf-e-tamannā tirī kitāb meñ huuñ

har ghaḌī zikr-e-mai hai ai vaa.iz
ho ga.ī terī to kitāb sharāb

tūfān-e-jahl ne mirā jauhar miTā diyā
maiñ ik kitāb ḳhuub huuñ par āb-dīda huuñ

jis ko masarratoñ kī duā.eñ diiñ umr bhar
dukh kī kitāb vo mujhe tarsīl kar gayā

yuuñ na paḌhiye kahīñ kahīñ se hameñ
ham bhī insān haiñ kitāb nahīñ

ham ne avval se paḌhī hai ye kitāb āḳhir tak
ham se pūchhe koī hotī hai mohabbat kaisī

mere ashkoñ ne umr bhar likkhī
ek ġham kī kitāb āñkhoñ meñ

maiñ vo ma.anī-e-ġham-e-ishq huuñ jise harf harf likhā gayā
kabhī āñsuoñ kī bayāz meñ kabhī dil se le ke kitāb tak

'sadā' ke paas hai duniyā kā tajraba vaa.iz
tumhārī baat meñ bas falsafa kitāb kā hai

shāḳh se is kitāb tak ḳhaak se le ke ḳhvāb tak
jā.egā dil kahāñ talak us gul-e-tar ke saath saath

maiñ use paḌhtī huuñ mohabbat se
us kā chehra kitāb jaisā hai

na barhaman huuñ na mullā na maulvī na atiit
jo pothī dair kī pān.cho o yā haram kī kitāb

huā ba-madrasa-e-ishq jab se tālib-e-ilm
bahut hai apne mutāla ko ek dam kī kitāb

shab-e-firāq se terī gayā huuñ sab kuchh bhuul
viqāya kanz-o-hidāya sabhī ilam kī kitāb