Tags-Kitab

kahānī ek na.ī detī hoñT kī jumbish
vo lab jo kholtā goyā kitāb lagtā thā

kitāb-e-zīst kā unvān ban ga.e ho tum
hamāre pyaar kī dekho ye intihā sāhab

maiñ ik zamāne meñ 'hāshim-razā' payambar thā
mohabbatoñ kā magar sāhib-e-kitāb na thā

nazmoñ kī kitāb meñ
logoñ ko us kī āḳhirī ḳhvāhish milī

hurūf-bīñ to sabhī haiñ magar kise ye shu.ūr
kitāb paḌhtī hai chehre kitāb-ḳhvānoñ ke

tum se jaanā ki ik kitāb huuñ maiñ
harf-dar-harf lā-javāb huuñ maiñ

dekhne vaale ye kahte haiñ kitāb-e-dahr meñ
tū sarāpā husn kā naqsha hai maiñ tasvīr-e-ishq

hurūf arz talab kī sūrat guzarte lamhoñ kā ḳhvāb likhnā
hamārī āñkhoñ ke sāmne hī hamāre dil kī kitāb likhnā

mujh ko shikva hai mire bhaa.ī ki tum jaate hue
le ga.e saath mirī umr-e-guzishta kī kitāb

is imtihāñ ke savāl aate nahīñ nisāboñ se maktaboñ ke
ajiib āshiq hai ye jo paḌh kar kitāb tayyār ho rahā hai

ga.e zamānoñ kī dard kajlā.ī bhūlī bisrī kitāb paḌh kar
jo ho sake tum se aane vaale dinoñ ke rañgīn ḳhvāb likhnā

munāfiqat kā nisāb paḌh kar mohabbatoñ kī kitāb likhnā
bahut kaThin hai ḳhizāñ ke māthe pe dāstān-e-gulāb likhnā

varaq varaq yuuñ hī phirtā rahūñ kahāñ tak maiñ
kitāb jaan ke bōk-shelf par sajā mujh ko

maiñ to thā maujūd kitāb ke lafzoñ meñ
vo hī shāyad mujh ko paḌhnā bhuul gayā

vaqt ke inhidām meñ, dil kī kitāb dab ga.ī
jaane kahāñ likhā thā tuu, sochtā huuñ nikāl kar

adh-khulī takiye pe hogī ilm-o-hikmat kī kitāb
vasvasoñ vahmoñ ke tūfānoñ meñ ghar jā.eñge ham

har ik kitāb-e-amal ke unvān apne apne
varaq varaq par qazā kī tahrīr ek jaisī

mere aurāq-e-pareshāñ dekhne vaale kabhī
maiñ kitāb-e-ishq thā aur dil mirā shīrāza thā

ek charāġh aur ek kitāb aur ek ummīd asāsa
us ke ba.ad to jo kuchh hai vo sab afsāna hai

ab kholiye kitāb-e-nasīhat ko shaiḳh phir
shab mai-kade meñ aap ne jo kuchh kiyā kiyā