Tags-Kitab

ik harf mere kaan meñ kahtā hai rāt-din
mujh ko kitāb-e-ḳhāk se bāhar nikāliye

qissa kitāb-e-umr kā kyā muḳhtasar huā
ruḳh dāstān-e-ġham kā idhar se udhar huā

ik ik kitāb is kī phūlā-phalā chaman hai
gulzār-e-be-ḳhizāñ hai urdu zabāñ hamārī

kitāb the to paḌhe jā sake na duniyā se
lo ab charāġh hue rahguzar meñ ham bhī haiñ

jo ḳhush-navīs mile koī deñge dil apnā
ham is kitāb meñ likhvā.eñge fasāna-e-ishq

na bhūlnā ki 'umar' haiñ ye dostoñ ke hisāb
kabhī na paḌhnā jo dil kī kitāb meñ likhnā

āshiq haiñ ham ko harf-e-mohabbat se kaam hai
mullā nikāltā phire matlab kitāb se

āñkheñ ḳhvāboñ ke varaq chehra haqīqat kī kitāb
ham hī ḳhud paḌh na sake us kī vafā kā matlab

vo ki ek chehra hai yā kitāb yā dariyā yā koī samundar hai
nīm-bāz āñkhoñ meñ us kī jhāñk kar dekheñ aao phir ġhazal kah leñ

zamīn o āsmāñ sūraj sitāre chāñd sayyāre
kitāb-e-dā.era-dar-dā.era maiñ paḌh nahīñ saktā

maiñ likh rahī thī dāstāñ tirā bhī naam aa gayā
kahānī apne aap hī kitāb se nikal ga.ī

ik kitāb-e-sad-hunar tashrīh-e-zā.il kā shikār
ek mohmal baat jaadū kā asar kartī huī

koī kitāb girānī thī koī sandesa
kisī tarah to use ham-kalām karnā thā

ġhaur se paḌh sako to samjhoge
ek dilkash kitāb hai duniyā

aayā hai jab señ baaġh taraf vo kitāb-rū
tab señ huā hai safha-e-barg-e-saman ġhalat

ishq kī ye kitāb le jaao
is kā har ek baab le jaao

kaam ā.eñgī tajarbe ke liye
zindagī kī kitāb le jaao

hai kyā kitāb-e-matla-e-anvār ruḳh tirā
sūraj kuuñ jis kā yak varq-e-zard boliye

maiñ jis ḳhvāb meñ rahtā huuñ pahle us ḳhvāb tak aayā vo
phir us ḳhvāb se dil ke raste merī kitāb tak aayā vo

palañg par jo kitāb o sinān rakh degā
na.e safar ke liye kuchh nishān rakh degā