Tags-Kitab

tamām umr ke zaḳhmoñ kā hai hisāb kitāb
hamārī fard-e-amal bhī lahū lahū hogī

hijr ke lamhe shumāreñ yā lakīreñ harf ham
har hisāb us ke liye hai har kitāb us ke liye

us ne mirī kitāb kā dībācha paḌh liyā
ab to kabhī kabhī kī mulāqāt bhī ga.ī

vo kaun thā jo mirī zindagī ke daftar se
hurūf le gayā ḳhālī kitāb chhoḌ gayā

havā meñ ek adhūrā fasāna kahtā huā
ye chaak chaak varaq jaane kis kitāb meñ thā

bahā le jā.eñgī maujeñ kitāb-e-zindagānī ko
sunāne ke liye koī fasāna bhī nahīñ hogā

hamāre dil meñ vahī hai jo sab pe zāhir hai
ki apnā chehra khulī ik kitāb jaisā hai

kitāb-e-gul kā rañgīñ har varaq hai
tumhārā naam kis ne likh diyā hai

na kah sako to, to aisā karnā
ki phuul rakh kar kitāb denā

inkār na iqrār na tasdīq na ījāb
a.amāl na afa.āl na sunnat na kitāb

luTe hue qadīm qāfiloñ ke marsiye ho tum
mirī har ek saañs meñ ġhazal kī ik kitāb hai

nigāh chāhiye tahrīr ho ḳhafī kī jalī
kitāb-e-zīst kā koī varaq bhī saada nahīñ

ham ne 'mushtāq' yuuñ hī kholā yādoñ kī kitāb-e-muqaddas ko
kuchh kāġhaz nikle ḳhasta se kuchh phuul mile murjhā.e hue

kitāb-e-zīst ke aurāq khul uThe jis dam
vo paḌhte paḌhte mirī dāstān tak pahuñche

kuchh to mahfūz rakhiye siine meñ
zindagānī khulī kitāb na ho

garche maiñ harf-e-ḳhāk huuñ 'ḳhurshīd'
phir bhī zeb--ekitāb-e-fitrat huuñ

suḳhan-shanās bhī hai fan se āshnā bhī hai
vo kal milā thā mujhe faiz kī kitāb liye

faroġh-e-kaifiyat-e-bāda se huā hai ye shādāb
na paḌh ye chehra mirā ye koī kitāb nahīñ hai

na kisī kamān meñ tiir hai na gulāb haiñ kisī haath meñ
mire shahr ke sabhī log haiñ kisī ajnabī sī kitāb se

ye ḳhayāl thā kabhī ḳhvāb meñ tujhe dekhte
kabhī zindagī kī kitāb meñ tujhe dekhte