Tags-Kitab

dekhiye jis ko liye phirtā hai 'anvar' dosh par
apnī nākāmī kisī kī kāmrānī kī kitāb

maiñ kitāb-e-ḳhāk kholūñ to khule
kyā nahīñ maujūd kyā maujūd hai

mirī uruuj kī likkhī thī dāstāñ jis meñ
mire zavāl kā qissa bhī us kitāb meñ thā

ek kitāb sirhāne rakh dī ek charāġh sitārā kiyā
mālik is tanhā.ī meñ tū ne kitnā ḳhayāl hamārā kiyā

ye aap kahāñ 'madnī'-sāhib kuchh ḳhair to hai mai-ḳhāna hai
kyā koī kitāb-e-mai dekhī do ek to daur-e-jām chale

jo naqsh-e-kitāb-e-shātir hai us chaal se āḳhir kyā chaliye
khele to zarā dushvār chale haare bhī to kuchh din naam chale

maiñ to thā maujūd kitāb ke lafzoñ meñ
vo hī shāyad mujh ko paḌhnā bhuul gayā

qur.āñ kitāb hai ruḳh-e-jānāñ ke sāmne
mus.haf uThā luuñ sāhab-e-qur.āñ ke sāmne

kitāb-e-zīst pe hai lafz-e-nā-shanāsā.ī
magar ye kyā ki likhā tum ko aaj tū maiñ ne

ham madrasān-e-ishq ke vo honhār tifl
ham se kitāb-e-aql uThā.ī na jā sakī

ġhazal aur qāfiyoñ meñ na kahī so kyūñki 'inshā'
ki havā ne ḳhud-baḳhud aa varaq-e-kitāb ulTā

insāñ se daur-e-nau ne muravvat bhī chhīn lī
bārish ne sar-varaq bhī utārā kitāb se

ise bhī khā ga.ī tahzīb dīmakoñ kī tarah
na.ī kitāb purānī huī salīqe se

kaun paḌhtā hai yahāñ khol ke ab dil kī kitāb
ab to chehre ko hī aḳhbār kiyā jaanā hai

qaazī ḳhabar le mai ko bhī likkhā hai vaañ mubāh
rishvat kā hai javāz tirī jis kitāb meñ

paḌh liyā ham ne harf harf use
us kā chehra kitāb kaisā thā

kisī kitāb meñ miltā nahīñ hai zikr 'āzam'
hameñ sikhā.e haiñ is zindagī ne aise sabaq

kitāb-e-ishq khulī thī sunā rahā thā koī
maiñ paḌh rahā thā nayā baab mere sāmne thā

ye rāste to mirī hathelī ke tarjumāñ haiñ
maiñ in lakīroñ meñ zindagī kī kitāb dekhūñ

varaq-e-intiḳhāb dil meñ hai
ek taaza kitāb dil meñ hai