Tags-Kitab

kisī kitāb kisī rahnumā kī hājat kyā
har ek naqs agar sher meñ ravā ho jaa.e

dhanak sī ḳhvāb sī ḳhushbū sī phir baras mujh par
na.ī ġhazal kī tarah tū mirī kitāb meñ aa

ham rāz-e-dil chhupāte magar apnī zindagī
puurī khulī kitāb agar ho to kyā kareñ

vazāhateñ to mohabbat meñ ham bhī karte magar
kitāb-e-dil kā hameñ koī hāshiya na milā

hurūf hī kī tarah TūTte bikharte rahe
kitāb paḌhte rahe ham jo raat bhar tanhā

tum par maiñ sahīfa-hā-e-kohna
ik taaza kitāb rakh rahā huuñ

bahut mazammat-e-mai-ḳhvār likh rahā hai shaiḳh
ḳhudā kare ki bane jadval-e-kitāb sharāb

fasurda hai ilm harf-hā-e-kitāb bhī bujh ke rah ga.e haiñ
hai raakh hī raakh madrasoñ meñ nisāb bhī bujh ke rah ga.e haiñ

misāl-e-sāda-varaq thā magar kitāb meñ thā
vo din bhī the maiñ tire ishq ke nisāb meñ thā

un ko koī 'suman' likhe kuchh bhī
maiñ ḳhudā kī kitāb likhtī huuñ

kitāb-e-dil ko maiñ tartīb de rahā huuñ phir
havā-e-tāza hai kaisā tirā mizāj batā

ashkoñ meñ piro ke us kī yādeñ
paanī pe kitāb likh rahā huuñ

kis tarah jam.a kījiye ab apne aap ko
kāġhaz bikhar rahe haiñ purānī kitāb ke

dil ko ghere haiñ rozgār ke ġham
raddī meñ kho ga.ī kitāb koī

raushnā.ī meñ kahīñ ghultī hai mauj-e-māhtāb
kyā koī aurāq-e-gul par tab.a kartā hai kitāb

kitāb-e-husn hai tū mil khulī kitāb kī tarah
yahī kitāb to mar mar ke maiñ ne azbar kī

vo jis ne dekhā nahīñ ishq kā kabhī maktab
maiñ us ke haath meñ dil kī kitāb kyā detā

huī hai jis meñ vazāhat hamāre hone kī
tirī kitāb meñ āḳhir vo hāshiya hai kahāñ

samajh sakā na use maiñ qusūr merā hai
ki mere sāmne to vo khulī kitāb rahā

tum hamārī taraf ruḳh kar ke kitāb dekhte
aur taḳhta-e-siyāh kī taraf ruḳh kar ke