Tags-Lab

saare raaz samjho lo lekin ḳhud kyuuñ un ko lab par laao
dhokā dene vaalā ro de aisī shaan se dhokā khaao

bekalī us kī na zāhir thī jo tū ai bulbul
dam-kash-e-'mīr' huī us lab o guftār ke saath

so dekh kar tire ruḳhsār o lab yaqīñ aayā
ki phuul khilte haiñ gulzār ke alāva bhī

zikr vasl aa aa ke lab par rah gayā
ye bhī kyā āshiq kī aa.ī ho ga.ī

dariyā bhī bahe mai ke par ai bāda-parastāñ
ye ḳhushk vo lab haiñ ki kabhī tar na hue aah

zulf se chashm-o-lab-o-ruḳh se ki tere ġham se
baat ye hai ki dil-o-jāñ ko rihā kis se kareñ

ye band lab haiñ ki koī khulī huī sī kitāb
mire savāl pe is dam to boltā koī

phūloñ kī tarah lab khol kabhī
ḳhushbū kī zabāñ meñ bol kabhī

sadā-e-ahd-e-vafā ko zavāl kyuuñ aayā
lab-e-sukūt pe harf-e-savāl kyuuñ aayā

tishna-lab kahte rahe suntī rahī pyāsī raat
subah tak chaltī rahī durd-e-tah-e-jām kī baat

kareñ e'tibār kisī pe kyā ki ye shahr shahr-e-nifāq hai
jahāñ muskurāte haiñ lab kahīñ vahīñ tanz hai kisī baat meñ

chaa.e meñ chīnī milānā us ghaḌī bhāyā bahut
zer-e-lab vo muskurātā shukriya achchhā lagā

kis kī kashtī tah-e-girdāb-e-fanā jā pahuñchī
shor-e-labbaik jo 'fānī' lab-e-sāhil se uThā

dekh ai ahl-e-nazar sabza-e-ḳhat meñ lab-e-lāl
rañg-e-yāqūt chhupā hai ḳhat-e-raihān meñ aa

jag ke ḳhūbāñ kā namak ho ke namak-parvarda
chhup rahā aa ke tire lab ke namak-dān meñ aa

faqat samajhne ke andāz haiñ qadīm o jadīd
fasāna-go ke to lab par vahī kahānī hai

yuuñ bhī hotī hai tire ġham kī navāzish aksar
lab pe hotī hai hañsī dil meñ fuġhāñ hotī hai

mar jā.ūñ Duub kar 'sharaf' us paar yaar hai
kashtī na ho koī lab-e-sāhil to kyā karūñ

paa.ī guloñ se ābla-pā.ī ki jab na daad
dīvāne haiñ ki sū-e-lab-e-ḳhār aa.e haiñ

ghabrā uThe haiñ zulmat-e-shab se to bār-hā
naale hamāre lab pe sharar-bār aa.e haiñ