Tags-Lab

jī kahtā hai kāñToñ ko bhī hoñToñ se lagā luuñ
har phuul se aatī hai lab-e-yār kī ḳhushbū

aa.e haiñ ishq meñ kabhī aise maqām bhī
āñkheñ thiiñ ashk-bār to lab muskurā.e haiñ

boltī āñkheñ dekhīñ jāgte lab dekheñ
jo sūrat ham ne dekhī hai sab dekheñ

kalī hai mohr-ba-lab phuul hai garebāñ chaak
ajal kī dhuup hai phirtī hai saa.e saa.e sabā

tishna-lab rakkhā tirī chashm-e-karam ne saaqī
jab mujhe bāda-parastī kā qarīna aayā

hamārā dard ajab marhale meñ hai ki jahāñ
vo be-suḳhan bhī nahīñ aur lab-kushā bhī nahīñ

is bazm meñ nahīñ koī āgāh varna kab
vaañ ḳhanda zer-e-lab udhar ashk-e-nihāñ nahīñ

pursish-e-hāl ko tum aaoge us vaqt mujhe
lab hilāne kī bhī tāqat ho zarūrī to nahīñ

lagtī hai qaus-e-quzah aariz pe shabnam
barg-e-gul jaise haiñ vo lab phuul kahiye

lab-o-āriz ke taqāzoñ ko bhalā kar yaaro
duur aa pahuñche haiñ ab lauT ke jaa.eñ kaise

zahr pī kar bhī jiyūñ maiñ ye alag baat magar
zindagī us lab-e-rañgīñ kī halāvat māñge

kise dekhte kise pūchhte ki ham aap kushta-e-hāl the
sar-e-lab kuchh aur the mas.ale pas-e-jāñ kuchh aur savāl the

diyā ho to diyā ho kuchh payām-e-shauq āñkhoñ ne
mire lab par to harf-e-mudda.ā ab tak nahīñ aayā

vo musāfir pā-ba-jaulāñ jaane kyuuñ lab-doz the
ek jaisā dard-e-afsāna sabhī chehroñ pe thā

gar ġhuncha-e-mahjūb tirī vaz.a ko dekhe
andāz-e-hayā-e-lab-e-ḳhāmosh meñ mar jaa.e

vaqt qarīb aa gayā haal ajiib ho gayā
aise meñ terā naam ham phir bhī na lab pe lā sake

lab-e-sāhil samundar kī farāvānī se mar jā.ūñ
mujhe vo pyaas hai shāyad ki maiñ paanī se mar jā.ūñ

lab-e-ḳhāmosh meñ pinhāñ hai koī raaz nahīñ
zindagī saaz hai jis meñ koī āvāz nahīñ

zālim ye soch kar ab detā hai bosa-e-lab
jab hoñT sī diye phir fariyād kyā karegā

na dekhī us ne kabhī lauh-e-dil pe abjad-e-ishq
to chashm-o-āri-o-lab se ġhazal bapā kar dī