Tags-Lab

zabāñ qaabū meñ hai sunñe ko tashbīheñ sune jaao
nazākat meñ kahāñ aurāq-e-gul us lab se jiite haiñ

guftugū meñ zabt lāzim hai zarā sī chuuk par
lab pe aa ke harf harf-e-mudda.ā ho jā.egā

agar ehtiyāt-e-ḳhitāb ho lab-e-sañg khil ke gulāb ho
tū kisī sanam ko sadā to de dar-e-but-kada abhī baaz hai

tafraqa ho is tarah to kyā jame ishrat kā rañg
dil za.īf-o-nātavāñ lab zer-e-bār-e-naġhma hai

jo jism o jaañ se chalī jism o jaañ talak pahuñchī
vo mauj-e-garmi-e-ruḳhsār-o-lab nahīñ aa.ī

mire zehn-o-dil kī basīrateñ ġham-e-zindagī kī haqīqateñ
mire lab pe giit nahīñ haiñ vo ki jo pāyaloñ meñ chhanak ga.e

hañs hañs ke kah rahā hai ye raat kā darīcha
ab guuñj ubhar rahī hai lab sī liye to kyā hai

pighal jaatī haiñ zanjīreñ sulag uThtī haiñ dīvāreñ
lab-e-ḳhāmosh meñ vo shola-e-āvāz hotā hai

dil-e-dard-mañd ko aaj bhī hai 'mujīb' hasrat-e-rāz-dāñ
maiñ vo ek naġhma-e-ārzū ki ḳhud apne lab pe harām huuñ

harīm-e-jāñ meñ mahak rahā hai vo harf-e-ḳhushbū
ki jo abhī shāḳhsār-e-lab par khilā nahīñ thā

ga.ī niiñ bū-e-shīr us lab se lekin dekh vo tal.at
vahī mahtāb kā hai āb-o-afsurda ho chakkā hai

aap to bas kholiye lab bosa dene ke liye
bosa dene par jo hai takrār kam kar dījiye

ham-navā ho ke mire tum bhī ġhazal-ḳhvāñ ho jaao
jo lab-e-jū-e-ravāñ sarv-ḳhirāmāñ dekho

sabr ai dost! abhī sard kahāñ ġham kī aag
lab tak aa.e bhī to jal jā.eñge sab aish ke raag

jo lab ko tire dekh ke behosh na hove
da.avā usī ko bhātā hai sāhab-jigarī kā

aañkh bhar ishq aur badan bhar chaah
shukr lab bhar gila zabāñ bhar thā

ek paiġhām ho shāyad mirī ḳhāmoshī bhī
tujh ko ma.alūm nahīñ lab mire siine vaale

dekhe se jis ke ġhuncha-sifat gul ho rashk hai
aisā to is janam meñ vahī ġhuncha-lab hai ab

ajab kyā hai jo ḳhāmoshī hī sharh-e-ārzū kar de
mire lab se to iz.hār-e-tamannā ho nahīñ saktā