Tags-Lab

khulā lab-e-gor se ye uqda ki ḳhvāb thī sab numūd-e-hastī
vuqūf nā-mahrūmī-e-manzil kamāl hai merī justujū kā

ye buuñd ḳhuun kī lauh-e-kitāb-e-ruḳh ke liye
ye til sar-e-lab-o-ruḳhsār dharne aa.e haiñ

koī hausla hai na mudda.ā koī aarzū hai na iltijā
mire dil meñ ik tirī yaad hai mire lab pe ik tirā naam hai

sar hai zeb-e-dār lekin lab tabassum-āshnā
haq-navā.ī par maiñ ḳhush huuñ ye sazā kyā chiiz hai

koī to samjhe mire karb kā lab-o-lahja
ye aarzū hai mujhe koī ham-zabāñ to mile

inkār ab to is lab-e-nāzuk se ho chukā
pahlī sī shakl ġhuncha-e-ummīd kī nahīñ

rotā hai be-sabātī-e-gulzār-e-dahr par
ġhunche ke lab pe ġhaur se dekho hañsī nahīñ

qatroñ ke lab pe shor-e-anal-bahr hai ravāñ
taqlīd kyā ye hazrat-e-mansūr kī nahīñ

āñkhoñ se qatl karte ho lab se jalāte ho
phir ye kamāl kyā hai jo afsūñ-garī nahīñ

hans ke paimāna diyā zālim ne tarsāne ke ba.ad
aaj nāzuk se lab-e-sāqī haiñ paimāne ke ba.ad

ḳhum-kadoñ meñ kuchh na hogā ek paimāne ke ba.ad
rah nahīñ saktī kabhī mai-lab tak aa jaane ke ba.ad

merī ḳhāmoshī-e-lab kā hai sadā se rishta
ye na samjhe koī be-saut-o-sadā huuñ maiñ bhī

us kū maiñ hue ham vo lab-e-bām na aayā
ai jazba-e-dil tū bhī kisī kaam na aayā

merī nazar pe saarā zamāna hai mo'tariz
lekin vo ik adā hai lab-e-bām jo bhī ho

maiñ tishna-lab zamīnoñ par kahāñ tak chashm-e-tar rakhtī
safar meñ zindagī ke har qadam par reg-zār aa.e

vafā ke tishnagī ke aur kuchh ma.asūm va.adoñ ke
ye saare qarz dekho ham lab-e-dariyā utaar aa.e

hue faiz-e-mai-kada se sabhī faizyāb lekin
jo ġharīb tishna-lab the vahī jaam tak na pahuñche

tirī be-ruḳhī pe zālim mirā jī ye chāhtā hai
ki vafā kā mere lab par kabhī naam tak na pahuñche

mire paas kyā vo aate mirā dard kyā miTāte
mirā haal dekhne ko lab-e-bām tak na pahuñche

aaj hai kuchh sabab aaj kī shab na jā
jaan hai zer-e-lab aaj kī shab na jā