Tags-Lab

saarī bastī chup kī dhund meñ Duubī hai
jis ne lab khole haiñ vo dīvānā hai

chhuT ga.iiñ nabzeñ hue lab band putlī phir ga.iiñ
aur vo mardūd kahtā hai ki ye dam-bāz hai

lab pe aayā na us kā naam kabhī
ġham kī parhez-gāriyāñ na ga.iiñ

sunahrī ghaḌiyāñ bhī āḳhir to biit jaatī haiñ
ye qaid hoñgī faqat lab pe baat aane se

hādse sab be-sabab kaise hue
bahte dariyā tishna-lab kaise hue

mire lab pe abhī vo savāl hai kyūñ? mire dil meñ abhī vo malāl hai kyūñ?
mire chāroñ-jānib jaal hai kyūñ? mire ḳhvāb kā ab anjām likho

gulāboñ ke hoñToñ pe lab rakh rahā huuñ
use der tak sochnā chāhtā huuñ

lene bhī de abhī mauj lab-e-sāhil ke maze
kyuuñ Dubotī hai ubharne kī tamannā mujh ko

ye tauq-e-bandagī vo phuul sī gardan ma.āz-allāh
vo shahd-ālūd lab aur talḳhī-e-shevan ma.āz-allāh

ab āsmāñ ban ke mirā mudda.ī banā
thī lab pe kuchh fuġhāñ to falak kā nishāñ na thā

havā-e-shauq ne rañg-e-hayā nikhārā thā
chaman chaman lab-o-ruḳhsār kā nazārā thā

salīqe ko lab-e-fariyād tere
adā kī daad farmāyā gayā hai

nazar jhuk rahī hai ḳhamoshī hai lab par
hayā hai adā hai ki an-ban hai kyā hai

kuchh ḳhabar le ki terī mahfil se
duur baiThā hai jāñ-ba-lab koī

lab-e-jū chhāñv meñ daraḳhtoñ kī
vo mulāqāt thī ajab koī

dil ye shādī-e-jarāhat se huā bālīda
ki tirā tiir yahāñ tā-lab-e-sūfār rahā

tishna-lab tālāb ne bādal ko phir dhokā diyā
phir vahī sahrā vahī sahrā kī vīrānī milī

lab-e-kashmīr par machaltī haiñ
kuchh sulagtī kahāniyāñ tauba

lab tumhāre miir kī us pañkhuḌī ke misl haiñ
is liye mujh ko merī tishna-labī achchhī lagī

miTte jaate naqsh dūd-e-dam kī aamad raft se
khulte jaate be-sadā lab ā.inoñ ke sāmne