Tags-Lab

husn-e-lab-o-gesū ko diyā ham ne nayā naam
aalam se judā rakhte haiñ andāz-e-nazar ham

dil meñ hai aks aap kā lab pe hai naam aap kā
aap kā 'muztar'-e-hazīñ aap ko bhūltā nahīñ

lab pe naġhma aur ruḳh par ik tabassum kī naqāb
apne dil kā dard ab 'mullā' ko kahnā aa gayā

pī ke aañsū sī ke lab baiThā huuñ yuuñ is bazm meñ
dar-haqīqat jaise mujh ko rañj sahnā aa gayā

yuuñ lage dard-baḳhshīda kī ibtidā bhī ik intihā
sañg chāTe lab-e-ishtihā pyaas bujhtī nahīñ zahr se

zulm sahte rahe shukr karte rahe aa.ī lab tak na ye dāstāñ aaj tak
mujh ko hairat rahī anjuman meñ tirī kyuuñ haiñ ḳhāmosh ahl-e-zabāñ aaj tak

lab khulte hī phuul haiñ jhaḌte
kitnī pyārī un kī adā hai

ahbāb mujh se qat-e-ta.alluq kareñ 'jigar'
ab āftāb-e-zīst lab-e-bām aa gayā

jab koī zikr-e-gardish-e-ayyām aa gayā
be-iḳhtiyār lab pe tirā naam aa gayā

har lab-e-jū par haiñ yuuñ sarv-e-ḳhirāmāñ saiñkaḌoñ
goyā shīshe meñ utar aa.ī haiñ pariyāñ saiñkaḌoñ

bin liye aaj terā bosa-e-lab
kab bhalā dūñgā tujh ko jaane aaj

yaañ lab pe laakh laakh suḳhan iztirāb meñ
vaañ ek ḳhāmushī tirī sab ke javāb meñ

lab ko ġhuncha zulf ko kālī-ghaTā ham ne kahā
dil ne ham ko jo bhī kahne ko kahā ham ne kahā

lab thartharā ke rah ga.e lekin vo ai 'jigar'
jaate hue nigāh milā kar chale ga.e

ai dil jo tujhe jag mane honā hai suraḳh-rū
tū piū ke lab-e-la.al-e-badaḳhshāñ kuuñ pahuñch tuuñ

tujh hijr siiñ huuñ jāñ-ba-lab ai yaar shifā-baḳhsh
jaldī se mire dard ke darmāñ kuuñ pahuñch tuuñ

koī dilkash sā afsāna kisī dildār kī bāteñ
fasurda raat hai chhoḌo lab-o-ruḳhsār kī bāteñ

ka.ī dinoñ se maiñ ik baat kahnā chāhtā huuñ
tū lab hilā to sahī haañ koī savāl to kar

hai tasavvur meñ ik ruḳh-e-raushan
aur lab par darūd jaarī hai

jī meñ hai phir kareñ iz.hār-e-vafā
phir tire larze hue lab dekheñ