Tags-Adoo

adū ko shikva-e-lazzat koī na rah jaa.e
mire lahū ko kuchh aisā hī zā.iqa de do

har qadam taaza kumak miltī rahī apne ḳhilāf
merā apnā hī adū mere alāva kaun thā

ḳhūbī pe ḳhush na honā insāniyat se nafrat
ahbāb kī burā.ī ḳhud se adū kī ḳhvāhish

adū hamārī ayādat ko le ke aa.e unheñ
kahāñ ye mar rahī ab bhī qazā nahīñ aatī

kaheñ adū kī burā.iyāñ kyā mile ho us se milo va-lekin
batā.e dete haiñ is liye ham ki ham se aa kar gilā na karnā

adū ke kahne se mujh ko zalīl-o-ḳhvār kiyā
sazā ye us kī hai maiñ ne jo tum ko pyaar kiyā

ġhazab hai qahr hai shāmat hai aafat hai qayāmat hai
baġhal meñ vo adū ke aaj kyuuñ ban-Than ke baiThe haiñ

jo adū ko bazm huī to kyā vo kuchh is tarah haiñ gurez-pā
kisī raah meñ kisī moḌ par kabhī jaise ham se mile na the

'shamīm' le ke kahāñ aa.ī zindagī mujh ko
ajiib shahr hai hamdam kahāñ adū bhī nahīñ

halāl hone ko sayyād se mohabbat kī
qazā jo aa.ī to mānūs maiñ adū se huā

arz apnī hai jo hai arz-e-adū
dekhiye karte haiñ vo irshād kyā

merī iizā se adū ho shaad kyā
tujh pe takiya o sitam-ījād kyā

tumhāre ham hamāre tum tumheñ kyā vāsta is se
adū ke āshnā kyuuñ ho hamāre āshnā ho kar

jis zaḳhm kī ho saktī ho tadbīr rafū kī
likh dījiyo yā rab use qismat meñ adū kī

merī begāna-ravī mujh ko bachā letī hai
intiqām apnī taraf se to adū lete haiñ

kaash maqbūl ho duā-e-adū
kyā karūñ vo bhī mustajāb nahīñ

jaan le kahtī huuñ lalkār ke maiñ tujh se adū
maiñ ne sīkhā hai sadā sach kī himāyat karnā

jinheñ hai tujh se mohabbat vo jānte bhī nahīñ
ki rashk kahte haiñ kis chiiz ko adū kyā hai

ham-ḳhāna-e-adū hai mubārak rahe use
jhagḌā tamām roz laḌā.ī tamām raat

kis roz tohmateñ na tarāshā kiye adū
kis din hamāre sar pe na aare chalā kiye