Tags-Adoo

rahīñ adū se vahī garm-joshiyāñ us kī
is āh-e-sard aur is chashm-e-tar se kuchh na huā

adū bhī ho sabab-e-zindagī jo haq chāhe
nasīm-e-sub.h hai roġhan charāġh meñ gul ke

kyā dil diyā thā is liye maiñ ne tumheñ ki tum
ho jaao yuuñ udū mire aġhyār ke liye

amal kuchh aisā kiyā adū ne ki ishq bāham lagā chhuḌāyā
ilāhī chhuT jaa.eñ us kī nabzeñ milāp jis ne mirā chhuḌāyā

abhī ham to adū se bhī badal leñ
jo ġham ko ġham se dil ko dil se badle

jazb-e-dil kā ye asar bazm-e-adū meñ bhī huā
kasmasāte hue kuchh us ne kahā aap hī aap

dil apnā hī raqīb yuuñ hone lagā 'haqīr'
koī shaqī kabhī na rahā us adū ke ba.ad

yuuñ kareñ ham ko pā.emāl adū
āsmāñ tujh ko dekhte haiñ ham

jo rañg baañT ke jaatā hai tinke tinke ko
adū zamīñ kā yahī āftāb niklegā

junūñ-pasand harīf-e-ḳhirad to ham bhī haiñ
adū jo nek nahīñ hai to bad to ham bhī haiñ

vo ishq-e-gul thā ki gulchīñ ke ham adū Thahre
ye rashk-e-gul hai ki ham bāġhbāñ se ruuTh ga.e

vasl-e-adū kā haal sunāne se fā.eda
allāh rahm kījiye bas bas sunā sunā

adū kā bhī to ghar hai ai charḳh zālim
jo aafat hai mere hī ghar TūTtī hai

bevafā.ī kā udū kī hai gila
lutf meñ bhī vo satāte haiñ mujhe

jaatā huuñ use DhūñDne mahfil meñ adū kī
dekhūñ to bigaḌtī hai ye taqdīr kahāñ tak

le kaam mohabbat se ki ye fāteh-e-kul hai
be-ma.arka tasḳhīr-e-adū kaun karegā

is ek ḳhauf se maiñ jañg meñ shahīd huā
adū kamīna hai ta.ane ḳhudā ke māregā

haal qābīl kā hābīl se pūchhe koī
vo zamāna hai ki bhaa.ī hai adū bhaa.ī kā

adū ke qaul kī tum ne hamesha pāsdārī kī
hamārī baat lekin aaj tak ik bhī nahīñ maanī

baḳht-e-rasā adū ke jo chāhe so kahe ab
yak baar yaar mujh tak maiñ yaar tak na pahuñchā