Tags-Adoo

piiTh meñ jo chubho gayā ḳhanjar
koī kam-hausla adū hogā

visāl ko ham taras rahe the jo ab huā to mazā na paayā
adū ke marne kī jab ḳhushī thī ki us ko rañj-o-alam na hotā

maiñ apnī maut pe raazī vo laash uThāne par
ab aage dekhnā hai marzī-e-adū kyā hai

ḳhud apne tarz-e-amal ko sañvār aur sañvār
mire rafīq tarīq-e-adū kī baat na kar

maiñ apne aap se hī jañg kartā rahtā huuñ
ki mujh pe hotā nahīñ ab mirā udū raushan

'ehsān' kaun mujh se sivā hai mirā adū
apne sivā kisī se shikāyat nahīñ mujhe

laag hai ham se adū ko to adū se hameñ rashk
ek hī aag meñ ham donoñ jalā karte haiñ

tiir mat dekh mire zaḳhm ko dekh
yār-e-yār apnā adū meñ gum hai

shab-e-vasl-e-adū kyā kyā jalā huuñ
haqīqat khul ga.ī roz-e-jazā kī

hai sair nigāhoñ meñ shabistān adū kī
kyā mujh se chhupāte ho tamāshā mire dil kā

hameñ bazm-e-adū meñ vo bulāte haiñ tamannā se
karam aisā bhī hotā hai sitam aisā bhī hotā hai

adū ke aate hī raunaq sidhārī terī mahfil kī
ma.āz-allāh insāñ kā qadam aisā bhī hotā hai

maiñ ne adū ke ḳheme meñ bhejā hai ik charāġh
ye ain intiqām se aage kī baat hai

ranj kyā vasl-e-adū kā jo ta.alluq hī nahīñ
mujh ko vallāh hañsātā hai rulānā terā

yahī hai āzmānā to satānā kis ko kahte haiñ
adū ke ho liye jab tum to merā imtihāñ kyuuñ ho

adū bhī tañg hai un ke sitam se
use apnī mujhe apnī paḌī hai

nirālī ham ne ye tahzīb dekhī bazm-e-jānāñ meñ
adū bhī sāmne aa.e to us ko bandagī kar lo

udū likkhe mujhe naama tumhārī mohr us kā ḳhat
jafā yuuñ bhī hai aur yuuñ bhī sitam yuuñ bhī hai aur yuuñ bhī

tirī ulTī chhurī dil meñ utar jaa.e
adū jab is tarah bismil ho ham hoñ

zarā ham bhī suneñ tum ne kahā kyā
adū se jab sar-e-mahfil ho ham hoñ