Tags-Adoo

uThā.ī kyuuñ na qayāmat adū ke kūche meñ
lihāz aap ko vaqt-e-ḳhirām kis kā thā

adū havāo karāchī ke log haare nahīñ
jo ghar girāo vo bār-e-digar banāte haiñ

ham ko hai un kī fikr to un ko adū kī fikr
donoñ haiñ ek silsila-e-iztirāb meñ

likkhūñgā ḳhat meñ ḳhuub adū kī burā.iyāñ
ho kar ḳhafā vo kuchh na likheñge javāb meñ

adū bhī bharne lage dam tirī rifāqat kā
ab aise-vaise tamāshe bhī yaar hone lage

rakhā na ham ko kahīñ kā tirī mohabbat ne
vo kah rahe haiñ adū se sunā sunā ke mujhe

zaḳhmī kiyā udū ko to marnā muhāl hai
qurbān jā.ūñ tere mujhe nīm-jāñ na chhoḌ

ek maiñ kyā adū bhī marte haiñ
nigah-e-lutf-āshnā kab tak

yā adū-e-bul-havas kī nāz-bardārī karo
yā banā lo taḳhta-e-mashq-e-sitam-rānī mujhe

ishq ne sāmne hote hī jalāyā dil ko
jaise bastī ko lagāve hai adū jañg meñ aag

adū is resmāñ se sar na chaḌh jaa.e
ye choTī kis liye pīchhe paḌī hai

adū sayyād gulchīñ kyuuñ ho mere nasheman ke
ye tinke bhī haiñ is qābil jinheñ barbād karte haiñ

dildār mere haañ se bahut mushta.il gayā
ai dil samajh le ḳhair adū kī nahīñ hai ab

adū kā maiñ huuñ adū muqarrar barābar aa ke hue barābar
bhalā badaltā na rañg kyuuñ kar vo rañg apne jamā chuke the

aa.eñ jā.eñge adū ham toḌ kar baiTheñge paañv
aap ne darbāñ banāyā ham se darbānī huī

qāf-o-lām-o-qāf hai har dam hameñ
ḳhush adū hai vaav sād-o-lām se

maiñ aur roz-e-vasl-e-adū aur shab-e-firāq
yahāñ āsmāñ na thā ki vahāñ āsmāñ na thā

vo aadmī kahāñ hai vo insān hai kahāñ
jo dost kā ho dost adū kā adū na ho

surḳhī hai teġh par na hinā tere haath meñ
qātil kahīñ safed adū kā lahū na ho

abhī sināñ ko sambhāle raheñ adū mere
ki un safoñ meñ kahīñ merā sar bhī aatā hai