Tags-Adoo

na mudārāt hamārī na adū se nafrat
na vafā hī tumheñ aa.ī na jafā hī aa.ī

is daur ke insāñ kā andāz nirālā hai
apne ko adū samjheñ ġhairoñ se shanāsā.ī

us kī rahmat ke sā.ebān meñ thā
merā shak bhī adū na kar paa.e

adū kī sañg-zanī kī nahīñ mujhe parvā
tire karam kā mayassar hai shāmiyāna mujhe

adū ko zer kar lo fāsloñ se
laḌā.ī ab hai lāzim dū-ba-dū kyā

adū ham se tumhāre zulm kā shikva nahīñ karte
dikhāte haiñ ki dekho ham bhī rakhte haiñ jigar itnā

adāvatoñ kā yuuñ āġhāz-e-iḳhtitām kareñ
adū mile to use ḳhair se salām kareñ

ḳhud apne zaḳhm pe itnā hazīñ na ho ki 'suhail'
saf-e-adū meñ bhī mātam dikhā.ī detā hai

sāmne lashkar thā jo vo haq pe thā
haq pe mujh ko ai adū honā paḌā

ḳhabar visāl-e-adū kī sun kar visāl ke ma.anī sochte haiñ
unhīñ ko vaañ kuchh nahīñ hai shādī ki ḳhush yahāñ ham bhī ho rahe haiñ

saarā lahū to sarf-e-shumār-o-adū huā
shām-e-firāq-e-yār kī ujrat kahāñ se laa.eñ

kyuuñ ki fursat adū se tum ko milī
jo tasavvur meñ mere aane lage

adū kī niiñd uḌā rakhī hai 'maz.har'
abhī tak ḳhvāb dafnāyā nahīñ hai

go aap ne javāb burā hī diyā vale
mujh se bayāñ na kiije adū ke payām ko

jañg hotī adū se ai 'sābir'
aur maiñ fat.h-yāb ho jaatā

haa.e kāfir tire hamrāh adū aatā hai
kyā kahūñ paas ye terā hai ki tū aatā hai

kyūñ-kar kahūñ 'ahsan' ki adū dost hai merā
ho nek vo bad-zāt samajh meñ nahīñ aatā

vo aa ga.e lo vo jī uThā maiñ adū kī ummīd-e-yās Thahrī
ajab tamāshā hai dil-lagī hai qazā khaḌī haath mal rahī hai

kyā kyā na dostī ke janāze uThā.e haiñ
thak-hār kar adū ke ilāqe meñ aa.e haiñ

taḌap rahā huuñ yahāñ maiñ tanhā vahāñ adū se vo ham-baġhal haiñ
kisī ke dam par banī huī hai kisī kī hasrat nikal rahī hai