Tags-Adoo

na kisī pe zaḳhm ayaañ koī na kisī ko fikr rafū kī hai
na karam hai ham pe habīb kā na nigāh ham pe adū kī hai

paltā hamāre ḳhuuñ se hai ishq magar adū se hai
apnā nahīñ jo bevafā ham ko yuuñ āzmā.e kyuuñ

qadmoñ meñ jab se mere haiñ taare dhare hue
saare adū haiñ ghar meñ bichāre dhare hue

dar-haqīqat vahī adū haiñ 'falak'
jin ko kahtā hai tū ki mere haiñ

banā huuñ maiñ aaj terā mehmāñ koī adū ko ḳhabar na kar de
uThā ke vo terī anjuman se kahīñ mujhe dar-ba-dar na kar de

phir bhī hai vaj.h-e-qarār-e-dil-e-muztar 'hāfiz'
vo adū diin kā dushman mirī jaañ kā hī sahī

lagā leñge use ahl-e-vafā be-shubah āñkhoñ se
agar pā-e-adū par us ne ḳhāk-e-āstāñ rakh dī

nazar meñ sulh bhī sar par lahū bhī dekhtā hai
mujhe to rashk se merā adū bhī dekhtā hai

adū ġhair ne tujh ko dilbar banāyā
koī joḌ mujh par muqarrar banāyā

zad meñ gar hai adū to ho vo to
ghaat mujh par lagā.e baiThe haiñ

sar-e-kārzār khaḌe ho 'shauq' to yuuñ hī siina super raho
ki vo log kaun se bach ga.e jinheñ ehtiyāt adū se thī

jab qāfila hamārā huā thā lahū meñ tar
us majma-e-adū meñ nazar tum bhī aa.e the

vo ā.ina-sīmā hai dil-e-saḳht-adū meñ
botal meñ utarte hue shīsha nazar aayā

miTāyā daur-e-sāqī mohtasib ne
adū jamshed kā zahhāk niklā

'ālī' muqāble kā na koī udū rahā
ham aap apne dūsre bante chale ga.e

hazār aañkh dikhāte rahe adū 'nāmī'
ġhazal ġhazal hī rahī farq ik zarā na paḌā

karte iz.hār haiñ dar-parda adāvat apnī
vo mire aage jo tārīf-e-adū karte haiñ

na-jāne kaun sī raa.ī adū ke haath lagī
ki nīm-jān hai us ko pahāḌ karte hue

ġham-e-jahāñ ho ruḳh-e-yār ho ki dast-e-adū
sulūk jis se kiyā ham ne āshiqāna kiyā

miyāñ jab itne saare dostoñ se kuchh nahīñ bigḌā
hameñ ma.alūm hai ab ik adū se kuchh nahīñ hogā