Tags-Adoo

dil rashk-e-adū se hai sipand-e-sar-e-ātish
ye sham.a tirī bazm meñ jaltī hī rahegī

kis se 'azīz' rakkhūñ ummīd dostī kī
sarkash hai nafs jab tak apnā hī maiñ adū huuñ

use sharmā.eñge zikr-e-adū par
ye qismat hai hijāb aa.e na aa.e

shab-e-vasl-e-adū terī balā se
kisī muztar ko ḳhvāb aa.e na aa.e

burīda-sar hī nahīñ the lahū meñ Duube hue
sunā hai neze adū ke bhī ashk-bār ga.e

ab kūcha-e-dil-bar kā rah-rau rahzan bhī bane to baat bane
pahre se adū Talte hī nahīñ aur raat barābar jaatī hai

yārab ġhalat ho fahm-e-kaj-andesh kā gumāñ
kuchh kah rahā hai in se adū iltijā ke saath

be-amāñ shahr meñ kaisī dahshat se guzrī thī maiñ kyā kahūñ
jab adū dekhtī apne hī bāl-o-par nochtī fāḳhta

sar-e-mahfil adū se vasl kā iqrār karnā thā
tumheñ kuchh bhī hayā aa.ī tumheñ kuchh bhī hijāb aayā

us kā dil aur dard adū kā
kis kā dil aur kis kā ghar ho

vo ho aur adū kā ghar ho
ro ro kar kis tarah sahar ho

aaj hai dil meñ mire kal hai adū kī aañkh meñ
tujh meñ bhar dī hai ye aisī kis ne shoḳhī kuuT kar

bas aaj roz kā jhagḌā miTā de ai qātil
adū nahīñ tirī mahfil meñ yā ġhulām nahīñ

adū ke tākne ko tum idhar dekho udhar dekho
magar ham tum ko dekhe jaa.eñ tum chāho jidhar dekho

kabhī mil ham se adū se kabhī
jo tum ne kiyā vo ravā ho gayā

vo kahā adū se hai maiñ ne kyā ki hue haiñ aap jo yuuñ ḳhafā
ye ġhazab ye jhuuT ye iftirā mire sāmne to bulā.iye

ibrat dilā chukī thī hamārī sitam-kashī
mutlaq shab-e-visāl adū shādmāñ na thā

dil ko kahāñ hai sadma-e-rashk-e-adū kī taab
sau imtihāñ haiñ aur ye ik imtihāñ na ho

badan chhū kar adū kā lauT aa.e
hamīñ se aa lage patthar hamāre

vahīñ lagī hai jo nāzuk maqām the dil ke
ye farq dast-e-adū ke gazand kyā karte