Tags-Adoo

ye āh-e-parda-dar aisī huī adū merī
habāb ho ga.ī āḳhir ko aabrū merī

hai ġham-e-marg-e-adū bhī but-e-kāfir kā banāv
qatra-e-ashk se haiñ rishta-e-gauhar palkeñ

veitnam-o-Korea se adū ko nikāl leñ
ā.eñge lauT kar lab-o-ruḳhsār kī taraf

suntā huuñ adū ko ḳhaak kiyā miTTī meñ milāyā ghar us kā
phūñkā na jalā kar mujh ko agar tū ai shab-e-hijrāñ kuchh na kiyā

kalām-e-fan se liyā kaam us ne mujh se bhī
tabāh apne adū ko kiyā bachā ke mujhe

adū kī bazm-e-tarab meñ sharīk kyā hote
mizāj-e-dost meñ ab tak bhī ishti.āl to hai

mirā haal aur phir merā bayāñ ho
ajab kyā gar adū bhī ham-zabāñ ho

adū tum se tum un se bad-gumāñ ho
tumhāre vo tum un ke pāsbāñ ho

kuchh fāsla nahīñ hai adū aur shikast meñ
lekin koī surāġh nahīñ hai giraft meñ

adū se kyā gila karnā ki vo ma.azūr lagtā hai
hamārī qadr-o-qīmat us ne pahchānī nahīñ hogī

tumheñ ho adū hī kā milnā mubārak
adū kī sī ham meñ liyāqat kahāñ hai

maiñ udū kī justujū meñ thā ki ik patthar lagā
muḌ ke dekhā to sināñ taane hue ahbāb the

khā ga.ī ahl-e-havas kī vaz.a ahl-e-ishq ko
baat kis kī rah ga.ī koī adū sachchā na ham

adū ne ham se hamārā ġhurūr māñgā thā
anā-parast the ham zindagī ko bhuul ga.e

jalte rahe haiñ apne hī dozaḳh meñ raat din
ham se ziyāda koī hamārā adū na thā

bigaḌte kyuuñ ho aapas meñ shikāyat kar hī lete haiñ
adū kā tazkira dushman kā charchā ho hī jaatā hai

vo adū ko saath laa.e haiñ mire ghar dekhiye
sharbat-e-dīdār ke nusḳhe meñ dāḳhil sam huā

hamāre haath meñ ho teġh qātil
na ho koī adū bismil ho ham hoñ

zamīn bik ga.ī saarī adū ke paas mirī
duā.eñ detā huuñ maiñ aap ke lagānoñ ko

adū hai tumhārā tumhāre hī andar
ḳhudī se tumheñ ham bachāyā kareñge