Tags-Mahshar

vo mujh se ye kahte haiñ ki mahshar ko milūñgā
maiñ un se ye kahtā huuñ ki jo kuchh ho abhī ho

titliyāñ rañgoñ kā mahshar haiñ kabhī sochā na thā
un ko chhūne par khulā vo raaz jo khultā na thaa!

huuñ vo mai-nosh na chūTegī sar-e-mahshar bhī
sāġhar ik haath meñ ik haath meñ miinā hogā

na.e ḳhvāboñ ke dil meñ sho.ala-e-ḳhurshīd-e-mahshar hai
zamīr-e-hazrat-e-insāñ kī sultānī nahīñ jaatī

gavāh kaun mire qatl kā ho mahshar meñ
abhī se saarā zamāna hai teġh-zan kī taraf

ye mohabbat rahegī mahshar tak
ek shab kā visāl thoḌī hai

jinheñ talāsh-e-sukūñ hai unheñ ye kyā mālūm
ki ek mahshar-e-ḳhāmosh hai jahān-e-sukūñ

mahshar kā ma.arka ho jis dam jahāñ ke andar
us din hameñ bachānā o lambī Dhaal vaale

ab phir hamārā is kā mahshar meñ mājrā hai
dekheñ to us jagah kyā insāf dād-gar hai

sāmān-e-vajd fitna-e-mahshar ko de diyā
vo ḳhaak par hamārī jo dāman-kashāñ nahīñ

chāk-e-jeb apne ko maiñ bhī juuñ garebān-e-sahar
nāsehā tā-dāman-e-mahshar tū silvātā nahīñ

yahīñ ho apnā sā haal dushman mile na dozaḳh balā se us ko
na nikle jab tak ye hasrat apnī ilāhī mahshar bapā na karnā

shor mahshar kā rahe kyuuñ na tire kūche meñ
jis jagah hoveñ ikaTThe dil-e-nālāñ itne

na hogā dāvar-e-mahshar ke aage hashr meñ bhī
ki umr bhar usī kāfir ko maiñ ne pyaar kiyā

fātiha paḌh ke vo rone jo lagā mere ba.ad
shor-e-mahshar mire madfan pe uThā mere ba.ad

miyān-e-mahshar malālatoñ se maiñ sham.a huuñ dil kī hālatoñ se
ki paañv tak sau ḳhijālatoñ se araq bahā hai mirī jabīñ kā

qahr hai sā.at-e-mahshar hai ki kohrām-e-fanā
ḳhaak is shahr-e-fanā-kosh meñ insāñ hoñge

yaum-e-jazā meñ fitna-e-mahshar kī ḳhair ho
pahle hī jo thī sarv-badan aur baḌh ga.ī

gar isī tarah saj banā.iyegā
mahshar ābād kar dikhā.iyegā

qurbān us nigāh ke jis ne 'hamīd' ko
sad-mahshar-e-ḳhayāl dar-āġhosh kar diyā