Tags-Manzil

manzil-e-marg meñ jiine kī adā rakhtā huuñ
ya.anī har haal meñ andāz judā rakhtā huuñ

iqbāl musā.id jab na rahā rakkhe ye qadam jis manzil meñ
ashjār se saaya duur huā chashmoñ ne ubalnā chhoḌ diyā

ghar tak dar-e-jānāñ se 'jalāl' aa.iye kyuuñ kar
ek ek qadam hai ka.ī manzil ke barābar

dil muttasil-e-kūcha-e-mahbūb huā gum
luTnā thā pahuñch kar mujhe manzil ke barābar

us ko manzil bhī ham samajhte haiñ
aa rahā ho jo rāsta ghar meñ

sambhal kar rahravān-e-rāh-e-ulfat saḳht manzil hai
sadā.eñ aa rahī haiñ aaj tak gor-e-ġharībāñ se

manzil pe na pahuñchā jab koī ilzām usī par kyuuñ aa.e
rah-rav ke bhaTakne meñ hai kuchh rahbar kī zimme-dārī bhī

sab qatl ho ke tere muqābil se aa.e haiñ
ham log surḳh-rū haiñ ki manzil se aa.e haiñ

mohabbat meñ ḳhayāl-e-sāhil-o-manzil hai nādānī
jo in rāhoñ meñ luT jaa.e vahī taqdīr vaalā hai

bas sulūk us kā hai manzil us kī hai
us ke dil tak jis ne apnī raah kī

dushvār sahī rasta lekin chalnā hai hameñ manzil kī taraf
manzil kī talab meñ 'ākif' jī kuchh paanā hai kuchh khonā hai

uThāo shauq se manzil meñ tum qadam apne
ki rāhzan jo hai is meñ vo rahnumā bhī hai

bolo nuqūsh-e-pā kuchh bolo tum to shāyad sunte ho
bhaag rahī hai rāhguzar ke kaan meñ kah kar manzil kyā

raah ab koī ho manzil kī taraf le jā.egī
paañv ab kaisā paḌe ḳhud hī sambhaltā jā.egā

bas ek vahshat-e-manzil hai aur kuchh bhī nahīñ
ki chand sīḌhiyāñ chaḌhte utarte rahte haiñ

maiñ zehn pe apne gahrī shikan maiñ sidq meñ apne bhaTkā huā
in bandhanoñ meñ ik añgḌā.ī manzil hai jo koī kaThin to yahī

pahuñch ke manzil-e-maqsad pe ye bhī socheñge
ki shab-ravī meñ dil-e-rāhzan pe kyā guzrī

manzil-e-gum-karda ik maiñ huuñ 'nasīr'
raah se jo koī bhaTkā lag gayā

na.e safar kī kahīñ ibtidā na ho manzil
ye paañv pūchh rahe haiñ thakan se Darte hue

shikast-e-dil kī manzil se agar guzre to kyā hogā
abhī tum ko shikast-e-jām se taklīf hotī hai