Tags-Manzil

manzil na qāfila na musāfir na rāhbar
ye kaise rāstoñ se guzarne lagī huuñ maiñ

ruḳh har ik tīr-e-nazar kā hai mire dil kī taraf
aane vaale aa rahe haiñ apnī manzil kī taraf

apnī marzī se nahīñ apne irāde se nahīñ
har musāfir ke qadam uThte haiñ manzil kī taraf

na sanam-kade kī manzil na haram kā āstāna
vo nazar jahāñ uThī hai vahīñ ruk ga.e haiñ raahī

'shād' in añdheroñ meñ kahkashāñ kī manzil se
raat ke guzarne kī sub.h raah taktī hai

sāthiyo thake-māñde hārte ho himmat kyuuñ
duur se koī manzil din meñ kab chamaktī hai

dil Thahar jaatā hai bhūlī huī manzil meñ kahīñ
maiñ kisī dūsre raste se guzar jaatā huuñ

bas tham gayā safīr-e-amal kah ke yā nasīb
jis jā pe ḳhatm manzil-e-tadbīr ho ga.ī

manzil to baḌī shai na milī rāhguzar bhī
bāñdhā thā baḌe shauq se kyā raḳht-e-safar bhī

pesh-e-nazar khaḌī rahī manzil-e-justujū magar
haath meñ bhī sakat na thī paañv meñ ḳhaar thā ajab

unhīñ ko haañ bas unhīñ ko ai 'qais' manzil-e-zindagī malegī
musībatoñ ke hujūm meñ bhī laboñ pe jin ke hañsī malegī

raat zanjīr sī qadam-ba-qadam
ek manzil hai koī jaada nahīñ

ek manzil hai magar raah ka.ī haiñ 'az.har'
sochnā ye hai ki jāoge kidhar se pahle

hamesha ek jā paatā huuñ ḳhud ko
hadeñ manzil kī shāyad kho ga.ī haiñ

manzil kī sa.ūbat kabhī āzār na hogī
maiñ naam tirā letā huuñ har gaam se pahle

manzil kī justujū meñ jise chhoḌ aa.e the
aatā hai yaad kyuuñ vahī manzar kabhī kabhī

kufr-o-islām ne maqsad ko pahuñchne na diyā
ka.aba-o-dair ko sañg-e-rah-e-manzil samjhā

koī manzil na koī jaada hai
ab musāfir kā kyā irāda hai

manzil hai apnī apnī 'qalaq' apnī apnī gor
koī nahīñ sharīk kisī ke gunāh meñ

uḌ ke ham pahuñcheñge manzil par havā-e-shauq meñ
kārvāñ ruk jaa.e gard-e-kārvāñ ruktī nahīñ