Tags-Manzil

ek manzil hai jo imkān se bāhar hai kahīñ
ik masāfat hai ki bas gard-e-safar khīñchtī hai

maiñ ki manzil kā talabgār na samtoñ kā asiir
tū ki dariyā jise har lamha samundar khīñche

Thahar kar saañs bhī ham ne na lī jab gāmzan the ham
jo ruk ruk kar chale rāhoñ meñ vo manzil ko kyā pahuñche

nazdīk sī shai sāya-e-hā.il se bahut duur
manzil hai shanāsā.ī-e-manzil se bahut duur

kab tak isī ko āḳhirī manzil kaheñge ham
kū-e-murād se bhī udhar jaanā chāhiye

jis kī koī āvāz na pahchān na manzil
vo qāfila-e-be-sar-o-sāmāñ bhī mirā hai

guzar jā manzil-e-ehsās kī had se bhī ai 'afqar'
kamāl-e-be-ḳhudī hai be-niyāz-e-hosh ho jaanā

manzil hī duur hai jo ye pahuñchī nahīñ hanūz
dam lene vaalī raah meñ umr-e-ravāñ na thī

bāzār-e-dahr meñ tirī manzil kahāñ na thī
yūsuf na jis meñ ho koī aisī dukāñ na thī

ye jāntā huuñ ki tai kar rahā huuñ rāh-e-hayāt
kahāñ pe hai mirī manzil use ḳhudā jaane

koī manzil kabhī nahīñ aa.ī
rāste meñ thā rāste meñ huuñ

nā-tavāñ ye aur manzil ishq kī dushvār-tar
chalte chalte thak na jaa.eñ rāh-ravān-e-kū-e-dost

lachak kī āḳhirī manzil meñ aa chukī hai shāḳh
bas aur is se ziyāda jhukāo mushkil hai

jab justujū na manzil aur ḳhvāb haiñ na armāñ
phir kis liye safar kā sāmān dekhtā huuñ

ik sham.a rah-e-shauq meñ manzil kī nishānī
ik paikar-e-lafzī kī navā-ḳhez javānī

isī liye mirī manzil na mil sakī mujh ko
ki mere saath ik rahzan thā ham-safar merā

vo to kab kā apnī manzil par pahuñch kar so chukā
chāñd kyā jaane ki rāh-e-pur-ḳhatar meñ kaun hai

samajhtā huuñ use bhī ek manzil rāh-e-himmat kī
purānā halqa-e-dār-o-rasan se ishq hai mujh ko

aap ke hāthoñ ne samjhā maar ke qābil mujhe
maiñ nigoḌī to ye samjhī mil ga.ī manzil mujhe

hijr kī manzil hameñ ab ke pasand aa.ī nahīñ
ham akele haiñ magar hamrāh tanhā.ī nahīñ