Tags-Manzil

vahī hotī hai rahbar jo tamannā dil meñ hotī hai
ba-qadr-e-himmat-e-rah-rau kashish manzil meñ hotī hai

mohabbat dil meñ hotī hai tamannā dil meñ hotī hai
javānī umr kī kitnī hasīñ manzil meñ hotī hai

har din ke guzarne meñ har raat ke Dhalne meñ
har chashm-zadan manzil har saañs masāfat thī

ishq meñ jitnā bahko utnā hī achchhā
ye gumrāhī manzil tak pahuñchātī hai

manzil pe aa ke dekh rahā huuñ maiñ aa.ina
kitnā ġhubār thā jo sar-e-rahguzar uThā

ye manzil ḳhvāb hī rahtī hamesha
agar ghar lauT kar aate nahīñ ham

raah tārīk thī dushvār thā har ek qadam
manzil-e-zīst ke har gaam pe Thokar khaa.ī

terī manzil agar mohabbat hai
tere raste kā rāsta huuñ maiñ

mil hī jā.egī kabhī manzil-e-maqsūd-e-sahar
shart ye hai ki safar karte raho shaam ke saath

kis jānib hai apnī manzil dorāhe par aa pahuñche
kis ne aisī raah batā.ī tum bhī chup aur ham bhī chup

ye moḌ kaaT ke manzil kā aks dekhoge
isī jagah magar imkān-e-hādsa hai bahut

maiñ ne manzil kī duā māñgī thī
merī raftār baḌhā dī ga.ī hai

vo ek shaḳhs ki manzil bhī rāstā bhī hai
vahī duā bhī vahī hāsil-e-duā bhī hai

ai junūñ kuchh to khule āḳhir maiñ kis manzil meñ huuñ
huuñ javār-e-yār maiñ yā kūcha-e-qātil meñ huuñ

nāzuk haiñ marāhil safar-e-manzil-e-ġham ke
is raah meñ kho jaatī hai āvāz-e-jaras bhī

qabl-e-manzil kahīñ luT jaane kī hasrat hai bahut
rāhbar hī nahīñ rahzan bhī mujhe chāhiye hai

pata mujhe bhī hai manzil nahīñ milegī ab
par ek baar to rasta badal ke dekhūñgā

'josh' huuñ maiñ dīvane-pan kī us manzil meñ
jahāñ raqīb bhī apnā nāma-bar lagtā hai

na jaane harf-e-talab hai nādim ki be-zabānī zabāñ hai apnī
dhaḌak rahā hai dil-e-tamannā ki manzil-e-āshiqī na.ī hai

maiñ naqd-e-jāñ tak luTā chukī thī nafas meñ sho.ale jalā chukī thī
tilism-e-ḳhvāb ab kahāñ se aayā ye manzil-e-be-ḳhudī na.ī hai