Tags-Manzil

dosto rūdād-e-manzil phir kabhī
rāsta chup thā mujhe pahchān kar

us kī galiyoñ meñ rahe gard-e-safar kī sūrat
sañg-e-manzil na bane raah kā patthar na hue

hamāre ham-safar ham se mukaddar haiñ bas itne par
ki ham bach kar ġhubār-e-rāh-e-manzil se nikalte haiñ

bas yahī hai le de ke dūrī-e-rah-e-manzil
do qadam dilerāna do qadam shitābāna

jis kī manzil kā nishāñ tak bhī nahīñ nazroñ meñ
kab se us raah meñ haiñ mahv-e-safar muddat se

merā maslak hai mohabbat dostī sheva mirā
merī manzil bhī yahī hai aur yahī rasta mirā

raat din lipTā hai pairoñ se mire andhā safar
ajnabī ehsās manzil kā patā de jā.egā

begāna-sifat jāda-e-manzil se guzar jā
har chiiz sazā-vār-e-nazāra nahīñ hotī

haiñ ishq kī rāheñ pechīda manzil pe pahuñchnā sahl nahīñ
raste meñ agar dil baiTh gayā phir us kā sambhalnā mushkil hai

manzil-e-shauq tai nahīñ hotī
Thekiyāñ nā-tavān lete haiñ

guzar jā aql se aage ki ye nuur
charāġh-e-rāh hai manzil nahīñ hai!

baḌhe chalo yahī vāraftagī kī manzil hai
rah-e-talab meñ kabhī shaam hī nahīñ hotī

jo ahl-e-ishq haiñ manzil kā ġham nahīñ karte
ye ḳhaas logoñ kā rasta hai aam thoḌī hai

har qadam kahtā hai tū aayā hai jaane ke liye
manzil-e-hastī nahīñ hai dil lagāne ke liye

manzil pe bhī āsūda-e-manzil na huā dil
phir ham ko bhaTakne kī duā kyuuñ nahīñ dete

maut ko ziist kī manzil kā patā kahte haiñ
rah-rav-e-ishq fanā ko bhī baqā kahte haiñ

nahīñ miltī unheñ manzil jinheñ ḳhauf-e-havādis hai
jo maujoñ se nahīñ Darte nadī ko paar karte haiñ

saath manzil thī magar ḳhauf-o-ḳhatar aisā thā
umr-bhar chalte rahe log safar aisā thā

isī ummīd par ham gāmzan haiñ rāh-e-manzil meñ
yahāñ zulmat sahī aage kahīñ tanvīr bhī hogī

phir rāh-rau se letā huuñ manzil kā kuchh surāġh
sab rāhbar haiñ mere koī rāhbar nahīñ