Tags-Manzil

uḌtā hai shauq-e-rāhat-e-manzil se asp-e-umr
mahmez kahte haiñge kise tāziyāna kyā

manzil kī tamannā ne rukne na diyā us ko
raste meñ musāfir ke go laakh shajar aa.e

ab bahut duur nahīñ manzil-e-dost
ka.abe se chand qadam aur sahī

bechainiyoñ ke rañg savāloñ meñ bhar ga.e
manzil se pūchhtā huuñ ki raste kidhar ga.e

ab baḌh ke zarā DhūñDh leñ manzil ke nishāñ bhī
uktā.e hue rāste bahlā to ga.e ham

kab sar-e-dosh-e-havā ḳhaak faqat merī hai
ab to ye manzil-e-ġhamnāk faqat merī hai

lipaT gayā tirā dīvāna garche manzil se
uḌī uḌī sī hai ye ḳhāk-e-rahguzar phir bhī

ḳhudā samjhe junūn-e-justujū ko
sar-e-manzil bhī hai manzil se duurī

kyā jāniye manzil hai kahāñ jaate haiñ kis samt
bhaTkī huī is bhiiḌ meñ sab soch rahe haiñ

asar-e-manzil-e-maqsūd nahīñ duniyā meñ
raah meñ qāfila-e-reg-e-ravāñ hai ki jo thā

tum apnī manzil ke rāstoñ meñ jo dekh paao
to rāstoñ kī sa.ūbatoñ meñ tumheñ milūñgī

sunte haiñ sabhī ġhaur se āvāz-e-jaras ko
manzil kī taraf koī ravāna nahīñ hotā

manzil-e-tark-e-tamannā hai janāb-e-'ārif'
dil meñ ab bhī havas-e-lāla-ruḳhāñ baaqī hai

sambhal o rahrav-e-rāh-e-talab manzil na kho jaa.e
lipaTtā hai ġhubār-e-rāh nā-hamvār dāman se

rāsta DhūñDo ki manzil zaat meñ mahsūr hai
band darvāzoñ ke bāhar hai kiran tanvīr kī

vaqf-e-mazāq-e-justujū dīda-o-dil haiñ ab kahāñ
manzil shauq-e-pā hī kī ġhairat-e-pā ko kyā huā

koshish-e-paiham āfrīñ manzil ab aa ga.ī qarīb
muzhda ho ārzū-e-dil paañv ke aable baḌhe

fareb khaa.e haiñ rañg-o-bū ke sarāb ko pūjtā rahā huuñ
magar natā.ej kī raushnī meñ ḳhud apnī manzil pe aa rahā huuñ

manzil pe dhyān ham ne zarā bhī agar diyā
ākāsh ne Dagar ko ujāloñ se bhar diyā

maiñ koī manzil nahīñ thā miil kā patthar thā bas
ba.ad mere bhī musalsal rāsta chaltā rahā