Tags-Manzil

junūn-e-rah-ravī-e-vaqt kī raftār se pūchho
koī manzil nahīñ lekin ye sub.h o shaam chaltā hai

na zauq-e-talab hai na ehsās-e-manzil
ye jiinā hai yā ḳhud-kushī ho rahī hai

fareb khā ke bhī sharminda-e-sukūñ na hue
na kam huā kisī manzil pe valvala dil kā

nazar ke sāmne manzil ke rāste haiñ bahut
ye sochtā huuñ qadam kis taraf baḌhā.ūñ maiñ

tābīr thī apnī bhī vahī ḳhvāb-e-safar kī
afsāna-e-mahrūmi-e-manzil bhī vahī thā

dushvār bahut ye manzil thī mar miT ke tah-e-turbat pahuñche
har qaid se ham āzād hue duniyā se alag ab rahnā hai

manzil shanās-e-rāh-e-haqīqat se pūchhiye
ham se ye kārvāñ hai ki haiñ kārvāñ se ham

manzil pe pahuñche qāfila vaale magar hanūz
khelā kiye ġhubār-e-pas-e-kārvāñ se ham

jab thī manzil nazar meñ to rasta thā ek
gum huī hai jo manzil to raste bahut

kiyā hai daaġh ne kyoñ us ko manzil-e-ḳhurshīd
hamārā dil hai ye kuchh burj-e-āftāb nahīñ

hasrateñ aa aa ke jam.a ho rahī haiñ dil ke paas
kārvāñ goyā pahuñchne vaalā hai manzil ke paas

jaise koī pā gayā ho apnī manzil kā surāġh
dhuup meñ baiThā huā rāh-e-safar meñ kaun hai

umr-bhar jin ko mayassar nahīñ hotī manzil
ḳhaak rāhoñ meñ uḌāte hue mar jaate haiñ

āvāra savālāt kī manzil bhī hai 'vāqif'
duniyā ke javābāt se māyūs na honā

vahīñ jaanā hai aa.e haiñ jahāñ se
haiñ vāqif manzil-e-umr-e-ravāñ se

samajhte haiñ jise manzil fareb-e-rāh-e-manzil hai
magar chup huuñ ye majbūrī sharīk-e-kārvāñ ho kar

manzil kā milnā zauq-e-tajassus kī maut hai
achchhā hai jo hayāt mirī kāmrāñ nahīñ

ai kārvān-e-ishq-o-vafā ke musāfiro
kahnā mirā salām bhī manzil jahāñ mile

be-ḳhudī manzil-e-irfāñ hai zarā hosh meñ aa
hai ḳhudī kā ye natīja ki ḳhudā yaad nahīñ

nahīñ hotī hai rāh-e-ishq meñ āsān manzil
safar meñ bhī to sadiyoñ kī masāfat chāhiye hai