Tags-Manzil

yaqīñ kā zikr hī kyā hai ki ab gumāñ bhī nahīñ
maqām-e-dard nahīñ manzil-e-fuġhāñ bhī nahīñ

ab tak koī batā na sakā rāh-e-ishq meñ
manzil kahāñ se paas hai 'bismil' kahāñ se duur

mohabbateñ to milīñ go vafā milī na milī
safar hasīn thā manzil kā kyā milī na milī

sar-e-manzil fareb-e-rahnumā kā toḌ mushkil thā
ġhanīmat hai ki shauq-e-marhala-ījād baaqī hai

baḌhtā gayā maiñ manzil-e-mahbūb kī taraf
haa.il agarche raah meñ sañg-e-garāñ mile

tai ho na sakī dūri-e-manzil ye alag hai
har moḌ pe raushan rahā imkāñ mire aage

huuñ miil ke patthar kī tarah rāhguzar meñ
manzil pe nazar rakhte haiñ insāñ mire aage

chalā maiñ jānib-e-manzil to ye huā ma.alūm
yaqīñ gumān meñ gum hai gumāñ hai poshīda

vo āvāra huuñ maiñ hai ḳhatm mujh par tez-raftārī
ki haiñ miqrāz donoñ paañv mere qat-e-manzil meñ

ye aalam nuur kā hai jalva-e-dāġh-e-mohabbat se
nahīñ kuchh farq mere dil meñ aur ḳhurshīd-e-manzil meñ

manzil-e-rah-ravāñ duur bhī dushvār bhī hai
koī is qāfile meñ qāfila-sālār bhī hai

ham josh-e-javānī meñ aa kar ik lā-mahdūd safar meñ the
ma.alūm huā manzil ye na thī jab ghaaT kināre aa pahuñche

balā se ho shaam kī siyāhī kahīñ to manzil mirī milegī
udhar añdhere meñ chal paḌūñgā jidhar mujhe raushnī milegī

āḳhir-e-kār chale tiir kī raftār qadam
ġhair manzil na paḌe raah meñ zinhār qadam

ka.ī paḌāv the manzil kī raah meñ 'tābish'
mire nasīb meñ lekin safar kuchh aur se the

manzil bhī koī ḳhaas milegī hameñ 'rūhī'
dushvār se dushvār safar yūñhī nahīñ hai

kiyā na tark-e-marāsim pe ehtijāj us ne
ki jaise guzre kisī manzil-e-najāt se vo

aah kis manzil pe pahuñchī haiñ mirī tanhā.iyāñ
DhūñDne se bhī nahīñ miltā mujhe ġham-āshnā

bosa-e-zanjīr merī āḳhirī manzil hai ab
dekhtā huuñ mujh se zindāñ aur kitnī duur hai

kuchh aisā ho ki jis se manzil-e-maqsūd ko pahuñchūñ
tarīq-e-pārsā.ī hove yā ho rāh-e-rindānā