Tags-Manzil

dil kī tamannā thī mastī meñ manzil se bhī duur nikalte
apnā bhī koī sāthī hotā ham bhī bahakte chalte chalte

khīñch ke lā.egā manzil ko mire qadmoñ tak
rāsta roke hai jo halqa-e-zanjīr mirā

us se aage jāoge tab jāneñge
manzil tak to rāsta tum ko laayā hai

shikast-o-reḳht kī is manzil-e-pareshāñ meñ
yaqīñ kī umr bhī kitnī gumāñ bhī kitnī der

maiñ azal se chal rahā huuñ thak gayā huuñ sochtā huuñ
kyā tirī duniyā meñ har manzil nishān-e-rahguzar hai

vo rāh-rau huuñ ki manzil nahīñ qayām nahīñ
talāsh-e-dost meñ kuchh qaid-e-sub.h-o-shām nahīñ

baġhair zād-e-safar ham pahuñch ga.e manzil
bhaTakte girte sambhalte qayām karte hue

jald manzil tak pahuñchne kā junūñ us ko rahā
zindagī bhar is liye rasta badaltā rah gayā

manzil hai kaḌī aisī kaḌī bhī to nahīñ hai
vo rāh-numā haiñ ki guzarne nahīñ dete

hadd-e-nazar meñ manzil-e-maqsūd hai magar
jā.egā kaun raḳht-e-safar kis ke paas hai

rāsta bhī ġhalat ho saktā hai manzil bhī ġhalat
har sitārā to sitārā bhī nahīñ ho saktā

ḳhabar-e-qāfila-e-gum-shuda kis se pūchhūñ
ik bagūla bhī na ḳhāk-e-rah-e-manzil se uThā

ab na koī manzil hai aur na rahguzar koī
jaane qāfila bhaTke ab kahāñ kahāñ yaaro

tumhāre rañg-e-jafā ko bhī hai qayām kahīñ
hamāre ishq kī manzil to kāmrānī hai

kashtī jab ho beach safar meñ ishq samundar sahrā kyā
manzil kī jānib ab dekho chhoḌo bhī tūfānoñ ko

ishq kī manzil meñ ab tak rasm mar jaane kī hai
husn kī mahfil meñ ab bhī ḳhaak parvāne kī hai

safar kī ye kaisī vus.ateñ haiñ ki rāsta hai na koī manzil
thakan kā ehsās bhī na utre qadam qadam rahguzār māñge

ek āvāra-e-manzil se mohabbat kar ke
tū baḌe shahr meñ rahne ko Thikāne māñge

jism-e-be-sar koī bismil koī fariyādī thā
hashr-sāmāniyāñ thiiñ manzil-e-jānāñ ke qarīb

dam rāh-e-shauq-o-zauq meñ letā nahīñ kahīñ
is par bhī tai na ho jo ye manzil to kyā karūñ