Tags-Manzil

ek muddat se musalsal huuñ safar meñ lekin
manzil shauq hai do-gām yahī lagtā hai

tārīkī meñ diip jalā.e insāñ kitnā pyārā hai
rāheñ DhūñDe manzil paa.e insāñ kitnā pyārā hai

har manzil-e-hayāt kī had paar ho chukī
le jā.egī ab aur ai umr-e-ravāñ kahāñ

ai ishq tū ne vāqif-e-manzil banā diyā
ab marhaloñ ko aur bhī mushkil banā diyā

apnā patā na jāda-e-manzil kī kuchh ḳhabar
ḳhud miT gayā huuñ 'naqsh' unheñ DhūñDhtā huā

na ġhubār-e-rah-e-manzil hai na āvāz-e-jaras
kaun mujh rahrav-e-gum-karda-e-nishāñ tak pahuñche

tirī manzil pe pahuñchnā koī āsān na thā
sarhad-e-aql se guzre to yahāñ tak pahuñche

pahuñch ke hashr ke maidāñ meñ haul kyuuñ hai 'azīz'
abhī to pahlī hī manzil hai justujū karte

mire rāhbar mujh ko gumrāh na kar de
sunā hai ki manzil qarīb aa ga.ī hai

jal-bujhe justujū ke parvāne
mustaqil manzil-e-surāġh jale

jis ko sab sahal-talab jaan ke karte the gurez
ik vahī shaḳhs sū-e-manzil-e-dushvār gayā

rāh-e-ulfat kā nishāñ ye hai ki vo hai be-nishāñ
jaada kaisā naqsh-e-pā tak koī manzil meñ nahīñ

bahut kuchh ho chukā tai jāda-e-umr-e-ravāñ apnā
pahuñch jā.egā manzil par kisī din kārvāñ apnā

har qāfila-e-dard-rasīda kī hai manzil
kyā jāniye ārām hai kyā mulk-e-adam meñ

ik soch meñ gum huuñ tirī dīvār se lag kar
manzil pe pahuñch kar bhī Thikāne na lagā maiñ

ḳhushī ke maare zamīñ par qadam nahīñ rakhte
jab aa.e qāfile vaale qarīb manzil ke

na sañg-e-mīl na naqsh-e-qadam na bāñg-e-jaras
bhaTak na jaa.eñ musāfir adam kī manzil ke

abhī lā kī manzil-e-saḳht meñ huuñ fareb-o-vahm-o-gumāñ liye
mire dil meñ phir bhī basā huā tirā naam radd-e-balā sā hai

har sub.h nikalnā kisī dīvār-e-tarab se
har shaam kisī manzil-e-ġhamnāk pe honā

mohabbat meñ ye kyā maqām aa rahe haiñ
ki manzil pe haiñ aur chale jā rahe haiñ