Tags-Manzil

mai-kade se vafā kī manzil tak
ham faqīroñ ke here-phere haiñ

agar terī ḳhushī hai tere bandoñ kī masarrat meñ
to ai mere ḳhudā terī ḳhushī se kuchh nahīñ hotā

lamha lamha hai ki hai qāfila-e-manzil-e-nūr
sarhad-e-shab meñ bhī farmān-e-sahar hai jaarī

sirf ik qadam uThā thā ġhalat rāh-e-shauq meñ
manzil tamām umr mujhe DhūñDhtī rahī

thī jā-e-visāl manzil-e-gor
hāsil huā mudda.ā mire ba.ad

firāq rut meñ akelā manzil kī justujū meñ nikal paḌā huuñ
visāl lamhoñ ke ham-qadam vo qadam damā-dam Thahar ga.e haiñ

mā.il-e-parvāz hai is kā adab
manzil-e-parvāz hai urdu zabāñ

merā sajda yā merī manzil-e-shauq
pūchh to kaun kāmyāb aayā

jiine vāloñ se kaho koī tamannā DhūñDeñ
ham to āsūda-e-manzil haiñ hamārā kyā hai

kyā hue rah-ravān-e-manzil-e-shauq
kyuuñ hai sunsān rāstā kuchh soch

ye tirī manzil vo mirā rasta
terā merā saath hī kyā hai

hasrat-o-yās-o-alam rah ga.e bairūn-e-lahad
qāfile vāloñ ne chhoḌā sar-e-manzil mujh ko

mujh ko kyā ġham jo haiñ tārīk adam ke raste
dāġh-e-dil hoñge charāġh-e-rah-e-manzil mujh ko

vafā-shi.ār tahī-dast aa.e manzil par
kahāñ kahāñ pe luTā kārvāñ nahīñ ma.alūm

jo har manzil meñ rahbar thā vo ab bhī saath hai varna
yahāñ har gaam par laġhzish kā imkāñ hai jahāñ maiñ huuñ

kamāl-e-be-ḳhudī manzil-ba-manzil kaam kartā hai
junūn-e-justujū sar-dar-garebāñ hai jahāñ maiñ huuñ

duur hai manzil to kyā rasta to hai
ik nazar us ne mujhe dekhā to hai

batāne vaale vahīñ par batāte haiñ manzil
hazār baar jahāñ se guzar chukā huuñ maiñ

ham rahe pīchhe vaa.e garm ravāñ
pahuñche manzil pe peshtar sab ke

abhī hai nūr-o-zulmat kī kashākash
abhī hai duur manzil āgahī kī