Tags-Manzil

laḌkhaḌānā bhī hai takmīl-e-safar kī tamhīd
ham ko manzil kā nishāñ laġhzish-e-paiham se milā

tire shauq meñ jo chalā jā rahā hai jo raste kī mushkil se ghabrā rahā hai
kabhī apnī manzil pe jā hī rahegā magar shart ye hai ki himmat na haare

vo duzdīda nigāheñ hoñ ki ḳhanjar-āzmā abrū
mohabbat kī har ik manzil pe rahzan paa.e jaate haiñ

hai yahī raah manzil-e-maqsūd
ḳhuub raste lagā diyā tū ne

na rāste kā unheñ ilm hai na manzil kā
hazār gard uḌe kārvāñ Thahartā nahīñ

kabhī to manzil-e-sub.h-e-yaqīñ mile 'ārif'
kahīñ to ḳhatm gumānoñ kā silsila ho jaa.e

mushkil hai ye 'daurāñ' is bhiiḌ ko samjhānā
muḌ muḌ ke jo rahzan se manzil kā pata pūchhe

haañ magar tasdīq meñ umreñ guzar jaatī haiñ 'nūr'
kuchh na kuchh rahtā hai sab ko apnī manzil kā patā

jānte ho nahīñ chalnā to yuuñ chalte kyuuñ ho
aaj bhī ġhāfil-e-manzil ho nikalte kyuuñ ho

manzil pe mujh ko lā kar dāman jhaTak rahe ho
yaad aa.egā mujhe ye ehsān zindagī meñ

ashk motī se bikhar jā.eñge rāhoñ meñ jahāñ
sū-e-manzil bhī mirā dīda-e-tar jā.egā

maut manzil hai masīhā kī to phir kyā kahnā
zindagī ko usī mahfil kī taraf le chaliye

dilrubā shahr ke kuchh se kuchh ho ga.e
merī manzil musalsal vahī kī vahī

kaisī talāsh-e-rāh ki manzil meñ aap haiñ
kaisī rajā-o-bīm ki ḳhud mudda.ā haiñ ham

justujū ne dost āḳhir justujū-e-dost hai
rahrav-e-rāh-e-talab gum-karda-e-manzil sahī

ḳhair ho yārab mire azm-o-yaqīñ kī ḳhair ho
laakh ehsās-e-fareb-e-dūrī-e-manzil sahī

ye bhī kyā manzar hai baḌhte haiñ na rukte haiñ qadam
tak rahā huuñ duur se manzil ko maiñ manzil mujhe

toḌ kar baiThā huuñ rāh-e-shauq meñ pā-e-talab
dekhnā hai jazba-e-be-tābī-e-manzil mujhe

rok saktī ho to baḌh kar rok le manzil mujhe
har taraf se aaj aatī hai sadā-e-dil mujhe

fikr-e-manzil hai na hosh-e-jāda-e-manzil mujhe
jā rahā huuñ jis taraf le jā rahā hai dil mujhe