Tags-Manzil

har qadam hādse har gaam marāhil the yahāñ
apne qadmoñ meñ har ik shai rahī manzil ke sivā

afsos ki inkār kī manzil nahīñ aa.ī
har chand ki dar band nahīñ kā nahīñ rakkhā

ab manzil-e-sadā se safar kar rahe haiñ ham
ya.anī dil-e-sukūt meñ ghar kar rahe haiñ ham

na jaane kaun sī manzil meñ ishq hai ki mujhe
mire hudūd se bāhar bulā rahā hai koī

har manzil thī dil kī manzil jab dil ko ġham-e-manzil na rahā
har kūcha kūcha-e-jānāñ thā jab kūcha-e-jānāñ bhuul ga.e

rukūñ to hujla-e-manzil pukārtā hai mujhe
qadam uThā.ūñ to rasta nazar nahīñ aatā

ḳhizr-e-manzil na thā ibn-e-mariyam na thā
ġham jahāñ thā koī shāmil-e-ġham na thā

tasvīr-e-inqilāb banā jā rahā huuñ maiñ
ab merī mustaqil koī manzil nahīñ rahī

aayā har ek gaam pe ik inqalāb-e-nau
insāñ kī mustaqil koī manzil nahīñ rahī

haa.e vahshat koī manzil ho Thahartā hī nahīñ
vaqt hai daam se chhūTe hue aahū kī tarah

intizār-e-manzil-e-mauhūm kā hāsil ye hai
ek din ham par ināyat kī nazar ho jā.egī

jise manzil samajh kar ruk ga.e ham
vahīñ se apnā āġhāz-e-safar thā

rah gayā shauq-e-manzil-e-maqsūd
pā-e-ḳhufta ne sargirānī kī

manzil qarīb aa.ī to rasta bhulā gayā
phirte haiñ ḳhaak chhānte rahbar ke shahr meñ

pahuñch chuke haiñ idhar ham-safar sar-e-manzil
udhar abhī ḳhalish-e-intizār raah meñ hai

rāheñ simaT simaT ke nigāhoñ meñ aa ga.iiñ
jo bhī qadam uThā vahī manzil-numā huā

tū manzil-e-hayāt se aage nikal gayā
maiñ aa rahā huuñ terā pata pūchhtā huā

kaheñ kis se ho ga.ī hai yahīñ aa ke ḳhatm duniyā
ki nahīñ hai koī manzil haram-e-butāñ se aage

aur ab sochtā huuñ fikr kī is manzil meñ
ishq kyuuñ aql kī dīvār se sar Takrā kar

koī manzil hī nahīñ Thahreñ murādeñ jis par
vaqt badle bhī to armān badal jaate haiñ